روس کے مغربی علاقے تامبوف میں یوکرین کی جانب سے کیے گئے ڈرون حملے میں ایک لاجسٹکس مرکز کو نشانہ بنایا گیا، جس کے نتیجے میں 7 افراد ہلاک جبکہ 24 زخمی ہو گئے۔
روسی حکام کے مطابق حملہ تامبوف کے علاقے میں واقع ایک لاجسٹکس مرکز پر کیا گیا، جہاں کام کرنے والے افراد اس وقت موجود تھے۔ حکام کا کہنا ہے کہ ہلاک ہونے والے تمام افراد مرکز کے ملازمین تھے، جبکہ زخمیوں کو فوری طبی امداد کے لیے اسپتال منتقل کر دیا گیا۔روسی حکام نے اس حملے کا الزام یوکرین پر عائد کرتے ہوئے کہا ہے کہ ڈرون حملے کے بعد امدادی کارروائیاں شروع کی گئیں اور متاثرہ مقام پر سیکیورٹی اقدامات مزید سخت کر دیے گئے ہیں۔دوسری جانب ماسکو کے میئر سرگئی سوبیانین نے دعویٰ کیا ہے کہ گزشتہ رات یوکرین کی جانب سے ماسکو کے علاقے کو نشانہ بنانے کے لیے 370 سے زائد ڈرونز بھیجے گئے۔انہوں نے کہا کہ روسی فضائی دفاعی نظام نے زیادہ تر ڈرونز کو فضا میں ہی تباہ کر دیا، جس کے باعث بڑے پیمانے پر نقصان سے بچا جا سکا۔
تاہم حملوں کے نتیجے میں ممکنہ نقصانات اور متاثرہ مقامات سے متعلق مزید تفصیلات فراہم نہیں کی گئیں۔حالیہ مہینوں میں یوکرین نے روس کے اندر فوجی تنصیبات، توانائی مراکز اور لاجسٹکس نیٹ ورک کو نشانہ بنانے کے لیے ڈرون حملوں میں اضافہ کیا ہے، جبکہ روس بھی یوکرین کے مختلف شہروں پر میزائل اور ڈرون حملے جاری رکھے ہوئے ہے۔ماہرین کے مطابق دونوں ممالک کے درمیان جاری جنگ میں ڈرونز کا استعمال مسلسل بڑھ رہا ہے، جہاں یہ حملے نہ صرف سرحدی علاقوں بلکہ دونوں ممالک کے اندر دور تک موجود اہم تنصیبات کو بھی متاثر کر رہے ہیں۔
