وزیرِ اطلاعات پنجاب عظمیٰ بخاری نے کہا ہے کہ رمضان المبارک کے دوران کسی کو گراں فروشی کی اجازت نہیں دی جائے گی، اور حکومت سختی سے قیمتوں پر عملدرآمد کروائے گی۔
انہوں نے ڈی جی پی آر میں پریس کانفرنس کے دوران بتایا کہ وزیراعلیٰ پنجاب مریم نواز کے وعدے کے مطابق مستحق افراد کو ان کا حق دہلیز پر فراہم کیا جا رہا ہے۔ نگہبان رمضان پیکج کے تحت 40 لاکھ سے زائد خاندانوں کو فی خاندان 10 ہزار روپے فراہم کیے جا رہے ہیں، اور نگہبان رمضان کارڈز گھروں تک پہنچائے جا رہے ہیں۔ انہوں نے یہ بھی بتایا کہ 10 مارچ تک تمام مستحق خاندانوں کو کارڈز کی ترسیل مکمل کر لی جائے گی، اور یہ کارڈز بغیر کسی چارجز کے دیے جا رہے ہیں، نہ ہی کسی پن کوڈ کی ضرورت ہے۔عظمیٰ بخاری نے کہا کہ ہر تحصیل میں “مریم کے مہمان دسترخوان” کے تحت روزانہ دو ہزار افراد کو افطاری فراہم کی جا رہی ہے، اور مخیر حضرات کو حکومت کی جانب سے مکمل معاونت فراہم کی جائے گی۔ اگر کوئی مستحق خاندان رہ جائے تو وہ ہیلپ لائن نمبر 1000 پر رابطہ کر سکتا ہے۔ انہوں نے کہا کہ پنجاب حکومت قوانین پر عملدرآمد کروانے میں مکمل آگاہ ہے اور رمضان میں گراں فروشی ہرگز برداشت نہیں کی جائے گی۔بطورِ جواب، وزیر اطلاعات نے یہ بھی بتایا کہ بانی پی ٹی آئی کی صحت کا مکمل خیال رکھا جا رہا ہے، روزانہ طبی معائنہ ہوتا ہے اور مناسب خوراک فراہم کی جا رہی ہے۔
اسی دوران، معاون خصوصی برائے فوڈ سیفٹی اینڈ کنزیومر پروٹیکشن سلمیٰ بٹ نے بتایا کہ مجموعی طور پر 42 لاکھ خاندانوں تک نگہبان رمضان کارڈ پہنچائے جائیں گے، جن میں 30 لاکھ نئے شامل خاندان بھی شامل ہیں۔ مسیحی برادری کے لیے بھی ایک لاکھ 57 ہزار کارڈز فراہم کیے گئے ہیں۔ 17 ہزار سے زائد کریانہ سٹورز پروگرام سے منسلک ہیں اور سہولت بازاروں میں پانچ کلومیٹر تک مفت ہوم ڈیلیوری کی سہولت دستیاب ہے۔سلمیٰ بٹ نے بتایا کہ رمضان سہولت بازاروں میں چینی 140 روپے فی کلو دستیاب ہو گی، جبکہ اوپن مارکیٹ میں اس کی قیمت 160 روپے ہے۔ مرغی کا گوشت 15 روپے کم اور انڈے 10 روپے کم نرخ پر فراہم کیے جائیں گے، اور 10 کلو آٹے کا تھیلا 1550 پوائنٹس پر دستیاب ہے۔ روزانہ مارکیٹ میں 15 لاکھ آٹے کے تھیلے فراہم کیے جا رہے ہیں۔
