ہالی ووڈ اداکارہ زینڈایا اور اداکار ٹام ہالینڈ کی شادی سے متعلق جاری قیاس آرائیوں میں نیا موڑ آگیا، زینڈایا کے معروف اسٹائلسٹ لا روچ نے اعتراف کیا ہے کہ انہوں نے ماضی میں دونوں کی شادی کے حوالے سے غلط بیان دیا تھا۔
لا روچ نے اس سے قبل دعویٰ کیا تھا کہ زینڈایا اور ٹام ہالینڈ خفیہ طور پر شادی کرچکے ہیں، جس کے بعد دونوں کی شادی کی خبریں سوشل میڈیا پر تیزی سے وائرل ہوگئی تھیں۔ تاہم جوڑے نے خود اپنی شادی کی باضابطہ تصدیق نہیں کی تھی۔اب 2026 ایمی ایوارڈز کی ریڈ کارپٹ تقریب کے دوران لا روچ نے اپنے سابقہ دعوے کی وضاحت کرتے ہوئے کہا کہ زینڈایا اور ٹام ہالینڈ کی ابھی تک کوئی باقاعدہ شادی کی تقریب نہیں ہوئی۔ انہوں نے اعتراف کیا کہ پہلے شادی ہوچکی ہونے سے متعلق ان کا بیان درست نہیں تھا۔لا روچ کے مطابق دونوں کی باضابطہ شادی ’Dune: Part Three‘ کی تشہیری مہم مکمل ہونے کے بعد ہوگی۔ انہوں نے یہ بھی کہا کہ زینڈایا ایک طویل عرصے سے ٹام ہالینڈ کو اپنی زندگی میں شوہر کی حیثیت دیتی ہیں، تاہم باقاعدہ شادی کی تقریب ابھی باقی ہے۔دوسری جانب زینڈایا اور ٹام ہالینڈ کی شادی سے متعلق مختلف دعوے اور سوشل میڈیا پر گردش کرنے والی تصاویر نے معاملے کو مزید پیچیدہ بنا دیا ہے۔
لا روچ نے وائرل ہونے والی اے آئی سے تیار کردہ شادی کی تصاویر کو جعلی قرار دیتے ہوئے زینڈایا کے مبینہ عروسی لباس پر بھی طنزیہ تبصرہ کیا۔رپورٹس کے مطابق ٹام ہالینڈ اور زینڈایا نے اپنی نجی زندگی کو ہمیشہ میڈیا کی توجہ سے بڑی حد تک دور رکھا ہے، جبکہ دونوں کی منگنی کی خبر 2025 میں سامنے آئی تھی۔ لا روچ کے تازہ بیان کے بعد بھی ان کی ازدواجی حیثیت سے متعلق مختلف رپورٹس اور قیاس آرائیاں جاری ہیں۔زینڈایا کی آنے والی فلم ’Dune: Part Three‘ کی تشہیری سرگرمیاں مکمل ہونے کے بعد شادی کی تقریب سے متعلق لا روچ کا دعویٰ اب مزید توجہ حاصل کر رہا ہے۔
