ایشیا کپ میں آج پاکستان اور متحدہ عرب امارات (یو اے ای) کے درمیان شیڈول میچ غیر یقینی صورتحال کا شکار ہو گیا ہے۔
ایشین کرکٹ کونسل (اے سی سی) نے بھی میچ کے انعقاد پر تذبذب کا اظہار کیا ہے۔
تنازع کی وجہ
ذرائع کے مطابق پاکستان کرکٹ بورڈ نے انٹرنیشنل کرکٹ کونسل (آئی سی سی) کو ایک خط لکھا ہے، جس میں مطالبہ کیا گیا ہے کہ میچ ریفری اینڈی پائیکرافٹ کو فوری طور پر ہٹایا جائے۔
پی سی بی کا مؤقف ہے کہ بھارت کے خلاف میچ کے دوران ریفری کا رویہ جانبدارانہ تھا، جو پاکستان ٹیم کے ساتھ ناانصافی کے مترادف ہے۔
بائیکاٹ کی دھمکی
پی سی بی نے آئی سی سی کو واضح طور پر آگاہ کیا ہے کہ اگر میچ ریفری کو تبدیل نہ کیا گیا تو پاکستان ایشیا کپ کے باقی میچوں کا بائیکاٹ کرے گا۔اس صورتحال نے ٹورنامنٹ کے مستقبل پر بھی سوالیہ نشان لگا دیا ہے۔
اے سی سی کا ردعمل
ایشین کرکٹ کونسل نے اس تنازع پر باضابطہ موقف اختیار کرنے سے گریز کیا ہے۔اے سی سی کے آفیشل ایکس (ٹوئٹر) اکاؤنٹ پر پاکستان اور یو اے ای کے میچ سے متعلق پوسٹ کی گئی تھی لیکن چند ہی گھنٹوں بعد اسے حذف کر دیا گیا، جس نے شکوک و شبہات مزید بڑھا دیے۔
