پاکستانی فیشن انڈسٹری کے معروف ماڈلز سبحان عمیس اور عبیر اسد کی شادی کے صرف سات ماہ بعد علیحدگی کی خبریں سامنے آ گئی ہیں، جس نے مداحوں کو حیران کر دیا ہے۔
ماڈل سبحان عمیس نے انسٹاگرام اسٹوری پر جاری ایک پیغام میں تصدیق کی کہ انہوں نے اور ان کی اہلیہ عبیر اسد نے باہمی رضامندی سے علیحدہ ہونے کا فیصلہ کر لیا ہے۔ ان کا کہنا تھا کہ اگرچہ طلاق کے قانونی مراحل ابھی باقی ہیں، لیکن دونوں کے درمیان علیحدگی طے ہو چکی ہے۔یہ جوڑا فروری 2025 میں ازدواجی رشتے میں منسلک ہوا تھا، اور ان کی شادی کی تصاویر سوشل میڈیا پر وائرل ہوئیں، جن پر مداحوں اور شوبز شخصیات نے نیک خواہشات کا اظہار کیا تھا۔ دونوں ماڈلز کو انڈسٹری میں کامیاب فیشن شوز، برانڈ کیمپیئنز اور ایوارڈز کے باعث "پاور کپل" بھی قرار دیا جاتا رہا۔
سبحان عمیس کی جانب سے علیحدگی کا اعلان سوشل میڈیا پر تیزی سے وائرل ہو رہا ہے۔ مداحوں اور صارفین کی جانب سے اس خبر پر مختلف ردعمل سامنے آ رہے ہیں—کچھ افراد نے اس فیصلے کا احترام کرتے ہوئے جوڑے کی پرائیویسی کا خیال رکھنے کی اپیل کی ہے جبکہ دیگر مداح اس اچانک فیصلے پر افسوس کا اظہار کر رہے ہیں۔ابھی تک عبیر اسد کی جانب سے اس معاملے پر کوئی باضابطہ بیان سامنے نہیں آیا۔
