دنیا کو اب اسرائیل کا راستہ روکنا ہوگا پاکستان پر کسی نے بھی حملہ کیا تو ہر قیمت پر دفاع کریں گے اسحاق ڈار

  بھارت سندھ طاس معاہدہ یکطرفہ ختم یا معطل نہیں کرسکتا ،  کشمیر سمیت تمام مسائل پر بات چیت  کیلئے  تیار ہیں لیکن کسی سے مذاکرات کی بھیک نہیں مانگیںگے،اسرائیل ہرگز امن نہیں چاہتا‘قطر پر حملہ ناقابل قبول ہے
 بطور ایٹمی طاقت پاکستان مسلم امہ کے ساتھ کھڑا ہے، پاکستان کے پاس مضبوط افواج اور جدید ہتھیارموجود ہیں، سلامتی کونسل میں اصلاحات کی جانی چاہئیں: نائب وزیراعظم و وزیر خارجہ کا   عرب ٹی وی الجزیرہ کوانٹرویو
اسلام آباد(مانیٹرنگ ڈیسک‘آئی این پی)نائب وزیراعظم و وزیر خارجہ اسحاق ڈار نے  کہا ہے  پاکستان جوہری طاقت ہے، ہماری جوہری طاقت محض دفاعی صلاحیت ہے، کبھی استعمال نہیں کی اور نہ ہی ارادہ رکھتے ہیں لیکن خودمختاری پر حملہ ہوا تو ہر قیمت پر دفاع کریں گے، چاہے کوئی بھی ملک ہو۔قطری دارالحکومت دوحا میں  عرب اسلامی ہنگامی سربراہ کانفرنس کے موقع پر عرب ٹی وی الجزیرہ کو دیے گئے خصوصی انٹرویو میں اسحاق ڈار نے قطر پر حالیہ اسرائیلی حملے کو بین الاقوامی قوانین، اقوامِ متحدہ کے چارٹر اور مسلم دنیا کی خودمختاری کے خلاف سنگین اقدام قرار دیتے ہوئے کہا ہے کہ  اگر مسلم دنیا نے صرف بیانات پر اکتفا کیا تو 2 ارب مسلمانوں کی نمائندگی کرنے والے ممالک اپنی عوام کی نظروں میں ناکام ٹھہریں گے۔ اسرائیل ایک  بے قابو ریاست بن چکی ہے جو ایک کے بعد دوسرے مسلم ملک کی خودمختاری کو چیلنج کر رہی ہے۔  آپ نے لبنان، شام، ایران اور اب قطر پر حملہ دیکھا۔ یہ روش ناقابلِ قبول ہے۔ انھوں نے واضح کیا کہ قطر اس حملے کے وقت امریکی اور مصری ثالثی کے ساتھ امن مذاکرات میں مصروف تھا اور اسی عمل کو سبوتاڑ کرنے کے لیے یہ حملہ کیا گیا۔یہ صرف قراردادوں اور بیانات کا وقت نہیں ہے، اب ایک واضح لائحہ عمل درکار ہے کہ اگر اسرائیل اپنی جارحیت نہ روکے تو کیا اقدامات کیے جائیں گے۔انہوں نے کہا  نے کہا کہ فوجی اقدام آخری راستہ  ہوتا ہے جب کہ پاکستان کی ترجیح ہمیشہ امن، بات چیت اور سفارتکاری رہی ہے، تاہم اگر بات چیت ناکام ہو جائے اور  جارحیت رکنے کا نام نہ لے تو پھر  مؤثر عملی اقدامات ضروری ہوں گے ، جن میں اقتصادی پابندیاں، قانونی چارہ جوئی، یا علاقائی سیکورٹی فورس کی تشکیل بھی شامل ہو سکتی ہے۔  بھارت سندھ طاس معاہدہ یکطرفہ ختم یا معطل نہیں کرسکتا ، بھارت کے ساتھ کشمیر سمیت تمام مسائل پر بات چیت  کیلئے  تیار ہیں تاہم  پاکستان کسی سے مذاکرات کی بھیک نہیں مانگے گا