واشنگٹن: امریکی نائب صدر جے ڈی وینس نے وائٹ ہاؤس کے سینئر مشیروں جیرڈ کشنر اور اسٹیو وٹکوف پر ایران سے متعلق مذاکرات کے دوران مالی فائدہ اٹھانے کے الزامات کو مکمل طور پر بے بنیاد قرار دیتے ہوئے مسترد کر دیا ہے۔
سوشل میڈیا پلیٹ فارم ایکس پر جاری اپنے بیان میں جے ڈی وینس نے کہا کہ اس حوالے سے گردش کرنے والی خبریں اور دعوے حقیقت پر مبنی نہیں ہیں۔ ان کے مطابق جیرڈ کشنر اور اسٹیو وٹکوف صدر ڈونلڈ ٹرمپ کی ٹیم کے قابلِ اعتماد ارکان ہیں اور ان پر اندرونی معلومات سے مالی فائدہ اٹھانے کا الزام عائد کرنا "مضحکہ خیز" ہے۔امریکی نائب صدر کا یہ ردعمل ایک سوشل میڈیا پوسٹ کے بعد سامنے آیا، جس میں دعویٰ کیا گیا تھا کہ ایران سے متعلق مذاکرات میں شامل بعض امریکی عہدیداروں نے اپنی ذمہ داریوں سے مالی فائدہ حاصل کرنے کی کوشش کی۔جے ڈی وینس نے ان دعوؤں کو یکسر مسترد کرتے ہوئے کہا کہ ان الزامات کی کوئی حقیقت نہیں اور نہ ہی ان کی تائید میں کوئی قابلِ اعتبار ثبوت پیش کیا گیا ہے۔
تاحال جیرڈ کشنر اور اسٹیو وٹکوف کی جانب سے اس معاملے پر کوئی علیحدہ بیان جاری نہیں کیا گیا، جبکہ ان کے خلاف سامنے آنے والے الزامات کے حق میں بھی کوئی عوامی شواہد پیش نہیں کیے گئے ہیں۔سیاسی مبصرین کے مطابق ایران اور امریکا کے درمیان جاری کشیدگی اور سفارتی رابطوں کے تناظر میں مختلف نوعیت کے دعوے اور افواہیں سامنے آ رہی ہیں، تاہم ان میں سے متعدد کی آزادانہ طور پر تصدیق نہیں ہو سکی۔
