اسرائیلی فوج نے اعلان کیا ہے کہ اس کے دستے جنوبی لبنان میں زمینی کارروائیاں شروع کر چکے ہیں، جہاں حزب اللہ کے ساتھ شدید جھڑپیں جاری ہیں۔
لڑائی خاص طور پر جنوبی لبنان کے اہم شہر خیام کے اطراف میں شدت اختیار کر گئی ہے۔عرب میڈیا کے مطابق اسرائیلی طیاروں نے خيام شہر پر کم از کم تین فضائی حملے کیے، جبکہ پیر کی صبح قصبہ یطار کو بھی نشانہ بنایا گیا۔ فوری طور پر جانی نقصان یا بڑے پیمانے پر تباہی کی مکمل اطلاعات سامنے نہیں آئیں۔رپورٹس کے مطابق اسرائیل نے جنوبی لبنان کے دیگر علاقوں السوانہ، قنطارا، کرقا، سلطانیہ اور برج القلاویہ پر بھی حملے کیے ہیں۔ اسرائیلی فوج کے مطابق ان کارروائیوں کا مقصد جنوبی لبنان میں اہم اہداف کو نشانہ بناتے ہوئے دفاعی پوزیشن مضبوط کرنا اور حزب اللہ کے عسکری ڈھانچے کو تباہ کرنا ہے۔
ماہرین کا کہنا ہے کہ خيام شہر اس لیے انتہائی اہم ہے کیونکہ یہ اسرائیلی سرحد اور لاطینی دریا کے قریب بلند مقام پر واقع ہے، جہاں سے شمالی اسرائیل اور جنوبی لبنان کے وسیع علاقوں پر نظر رکھی جا سکتی ہے۔دوسری جانب اسرائیلی حملوں کے باعث جنوبی لبنان کے کئی علاقوں سے بڑے پیمانے پر نقل مکانی جاری ہے، اور اب تک تقریباً آٹھ لاکھ افراد اپنے گھروں سے بے گھر ہو چکے ہیں۔لبنان میں جاری حملوں میں اب تک کم از کم 850 افراد جاں بحق ہو چکے ہیں، جن میں درجنوں خواتین اور بچے بھی شامل ہیں۔
