دو مرتبہ ورلڈ کپ جیتنے والی ٹیم یوراگوئے کو اپنے پہلے میچ سے قبل سفری مشکلات کا سامنا کرنا پڑا، جس کے بعد یوراگوئے فٹبال فیڈریشن نے تاخیر کا ذمہ دار فیفا کو قرار دے دیا۔
میڈیا رپورٹس کے مطابق Uruguay national football team میکسیکو کے شہر کنکون میں ٹریننگ کر رہی تھی اور اسے سعودی عرب کے خلاف میامی میں شیڈول میچ کے لیے امریکا روانہ ہونا تھا۔تاہم ٹیم کے لیے مختص طیارے کو ضروری دستاویزات مکمل نہ ہونے کے باعث امریکا میں داخلے کی اجازت نہ مل سکی، جس کے باعث ٹیم کی روانگی میں تاخیر ہو گئی۔یوراگوئے فٹبال ایسوسی ایشن نے اپنے بیان میں کہا کہ تاخیر ان کے اختیار سے باہر وجوہات کے باعث ہوئی، جبکہ ایک ترجمان نے اس مسئلے کی ذمہ داری FIFA پر عائد کی۔دوسری جانب فیفا نے مؤقف اختیار کیا کہ یہ معاملہ میکسیکو میں ایئرلائن کی پرمٹ سے متعلق تکنیکی غلطی کا نتیجہ تھا اور اس حوالے سے متعلقہ اداروں سے مسلسل رابطہ رکھا گیا تاکہ مسئلہ حل کیا جا سکے۔
بعد ازاں یوراگوئے کی ٹیم متبادل پرواز کے ذریعے فلوریڈا پہنچ گئی، جہاں اس نے اپنی تیاریوں کا سلسلہ دوبارہ شروع کیا۔ہیڈ کوچ مارسیلو بیلسا اور کپتان جوزے ماریا خیمنیز نے معاملے کو معمولی قرار دیتے ہوئے کہا کہ سفری تاخیر سے ٹیم کی تیاریوں پر کوئی خاص اثر نہیں پڑا۔واضح رہے کہ یوراگوئے اور سعودی عرب کے درمیان میچ ایک ایک گول سے برابر رہا۔ورلڈ کپ کے آغاز کے بعد مختلف ٹیموں، آفیشلز اور شائقین کو ویزا اور سفری رکاوٹوں کا سامنا بھی کرنا پڑ رہا ہے، جس سے ٹورنامنٹ کے دوران مزید انتظامی چیلنجز کے خدشات ظاہر کیے جا رہے ہیں۔
