خالد مقبول صدیقی حکومت چھوڑ نے کا عندیہ

نہ جانے کب حکومت چھوڑ دیں، حکومت چھوڑنے میں ریکارڈ بہت خراب ہے : چیئرمین ایم کیو ایم 
کراچی ( خصوصی رپورٹ) ایم کیو ایم پاکستان کے چیئرمین خالد مقبول صدیقی نے حکومت سے علیحدگی کا عندیہ دیتے ہوئے کہا ہے کہ نہ جانے کب حکومت چھوڑ دیں، حکومت چھوڑنے میں میرا ریکارڈ بہت خراب ہے۔ خالد مقبول صدیقی نے کراچی میں منعقدہ ایک تقریب سے خطاب کرتے ہوئے کہا کہ فیصل واوڈا نے کبھی نہیں کہا وہ ہمارے سینیٹرہیں۔ان کا کہنا تھا کہ جس حکومت میں بلدیاتی معاملات خود مختار نہ ہوں، ایسی جمہوریت کا کوئی فائدہ نہیں۔خالد مقبول صدیقی نے کہا کہ کراچی شہر کی تعمیر اور اس سے محبت کرنا ہوگی، جب تک خوشحالی کراچی میں نہیں آئے گی ملک خوشحال نہیں ہوگا، دعا کریں کراچی بھی اسلام آباد جیسا ہوجائے۔ انہوں نے کہا کہ 26ویں آئینی ترمیم کے وقت بہت عجلت تھی، آئینی ترمیم کے باعث مدارس کے بارے میں نہیں سوچا گیا۔ کراچی کے بلدیاتی اختیارات ایک دھوکہ ہے،خالد مقبول صدیقی کا کہنا تھا نئے پاکستان کی تعمیر کے لیے نئے انداز سے سوچیں، کراچی چل رہا ہے تو ملک پل رہا ہے۔