پشاور: پاکستان تحریک انصاف (پی ٹی آئی) کے رہنما سلمان اکرم راجا نے کہا ہے کہ عدالت نے وزیر اعلیٰ کے حلف کو روکنے کی استدعا مسترد کر دی۔
انہوں نے اس موقع پر کہا کہ آج اللہ کے فضل سے آئین کے دشمن کی ایک اور کوشش ناکام ہوئی۔پی ٹی آئی رہنما جنید اکبر، سلمان اکرم راجا اور دیگر رہنما پشاور ہائی کورٹ کے باہر میڈیا سے گفتگو کر رہے تھے، جہاں انہوں نے کہا:"جمہوریت کی فتح ہوئی ہے، آج نئی حکومت ہوگی اور وزیراعلیٰ حلف اٹھائیں گے۔"سلمان اکرم راجا نے کہا کہ ہم بانی پی ٹی آئی کے کارکن ہیں، ہمیں کسی کا خوف نہیں، ہم عوام اور قانون کی پاسداری کے لیے لڑیں گے۔انہوں نے مزید کہا کہ امن و امان کی صورتحال اولین ترجیح ہے، اور بانی پی ٹی آئی بے گناہ جیل میں ہیں، جبر کو ہم ختم کریں گے۔ بانی کی آزادی ہم سب کی آزادی ہے۔سلمان اکرم راجا نے اسمبلی میں ہونے والی 26ویں ترمیم پر بھی بات کرتے ہوئے کہا کہ:"یہ اسمبلی فارم 45 کی اسمبلی ہے، اس کو 26ویں ترمیم کا اختیار نہیں تھا۔ جبری طور پر لوگوں کو اغوا کرکے ترمیم کی گئی، یہ شرمناک بات ہے۔ بہرحال آئین کی ایک شکل موجود ہے، ہمیں اسی کے تحت چلنا ہے۔ آج عدالتیں بھی 26ویں آئین ترمیم کے تحت چلتی ہیں۔"
اس موقع پر جنید اکبر نے کہا:
"ہم اس مشکل وقت میں ایک ساتھ کھڑے تھے۔ تمام سیاسی پارٹیوں کو ساتھ لے کر چلنا چاہتے ہیں۔""یہ ادارے ہمارے ہیں، یہ ملک سب کا ہے، سیاست آتی جاتی ہے۔ ہم اکٹھے ہوں گے تو ملک ترقی کرے گا۔ ہم نے آئین کے تحت چلنا ہے اور مسائل کا حل نکالنا چاہتے ہیں۔"انہوں نے مزید کہا کہ گزشتہ عرصے میں 22 بڑے اور ہزاروں چھوٹے آپریشنز ہوئے لیکن مسئلہ حل نہیں ہوا۔یہ بیان پی ٹی آئی کی قانونی اور آئینی حکمت عملی، پارٹی کی یکجہتی اور آئین کی پاسداری کے عزم کو ظاہر کرتا ہے، جبکہ عدالت کے فیصلے کو پارٹی کی جمہوری فتح کے طور پر پیش کیا گیا ہے۔
