ویب ڈیسک:پاکستان اور آسٹریلیا کے درمیان شیڈول ٹی20 سیریز کے پہلے میچ میں قومی ٹیم کے کپتان محمد رضوان نے ایک اہم غلطی کی، جو کہ امپائرز کی نظروں سے بچ گئی۔
میچ کا حال: یہ میچ برسبین کے گابا کرکٹ اسٹیڈیم میں بارش کے باعث مختصر کر دیا گیا تھا، جس میں دونوں ٹیموں کو 7 اوورز کا موقع ملا۔ اس میچ میں آسٹریلیا نے پاکستان کو 29 رنز سے شکست دے کر سیریز میں 0-1 کی برتری حاصل کر لی۔
غلطی کی تفصیلات: بارش کی وجہ سے میچ کو 7 اوورز تک محدود کر دیا گیا تھا، اور اس کے مطابق ہر ٹیم کے 2 بالرز کو صرف 2، 2 اوورز کرانے کی اجازت تھی، جبکہ باقی 3 اوورز کو تین مختلف بالرز کے درمیان تقسیم کیا جانا تھا۔
تاہم، کپتان محمد رضوان نے تین فاسٹ بولرز (شاہین شاہ آفریدی، نسیم شاہ، اور حارث رؤف) سے 2، 2 اوورز کروا دئیے، جو کہ قوانین کے مطابق غلط تھا۔ لیکن اس صورتحال میں فیلڈ اور تھرڈ امپائرز نے کوئی نوٹس نہیں لیا اور پاکستان پنلٹی سے بچ گیا۔
دوسرا میچ: پاکستان اور آسٹریلیا کے درمیان سیریز کا دوسرا ٹی20 میچ کل (ہفتے) کو کھیلا جائے گا، جس میں پاکستان ٹیم اپنی غلطیوں سے سبق سیکھتے ہوئے بہتر کارکردگی دکھانے کی کوشش کرے گی۔
