بالی ووڈ کے سپر اسٹار ہریتک روشن حالیہ دنوں میں اپنی فلم وار 2 کی ریہرسل کے دوران زخمی ہوگئے تھے۔
انہیں اپنی ٹانگ پر اندرونی چوٹ آئی، جس کے بعد ڈاکٹروں نے انہیں مکمل آرام کرنے اور کام سے کچھ وقت کے لیے گریز کرنے کی ہدایت کی تھی۔ نتیجتاً، وار 2 کی شوٹنگ بھی ملتوی کر دی گئی۔حال ہی میں ہریتک کو فلم کے ہدایتکار آیان مکھرجی کے والد دیب مکھرجی کی آخری رسومات میں شرکت کرتے ہوئے لاٹھی کی مدد سے چلتے ہوئے دیکھا گیا۔ اس ویڈیو نے سوشل میڈیا پر تہلکہ مچا دیا اور ان کے مداحوں نے ہریتک کے زخمی ہونے پر تشویش کا اظہار کرتے ہوئے ان کی جلد صحتیابی کے لیے دعائیں کیں۔
آیان مکھرجی کے والد کا انتقال طویل علالت کے بعد 83 سال کی عمر میں ہوا تھا۔ ہریتک روشن نے ان کے آخری رسومات میں شرکت کی، اور اس موقع پر ان کی حالت دیکھ کر ان کے مداحوں نے نہ صرف آیان مکھرجی کے والد کے انتقال پر افسوس کا اظہار کیا بلکہ ہریتک کی جلد صحتیابی کی دعا بھی کی۔واضح رہے کہ وار 2 کی شوٹنگ کو ہریتک کی مکمل صحتیابی کے بعد دوبارہ شروع کیا جائے گا، اور ان کی زخمی ٹانگ کی حالت پر ان کے مداح مسلسل نظر رکھے ہوئے ہیں۔
