اوسلو: ناروے کی عدالت نے شہزادی میٹی میرٹ کے بڑے بیٹے ماریئس بورگ ہوئبی کو جنسی زیادتی (ریپ) کے مقدمے میں 4 سال قید کی سزا سنادی ہے۔
میڈیا رپورٹس کے مطابق عدالت میں سماعت کے دوران استغاثہ نے متعدد شواہد پیش کیے جنہیں جج نے ملزم کے خلاف جرم ثابت کرنے کے لیے کافی قرار دیا۔ فیصلے میں کہا گیا کہ متاثرہ خاتون کا بیان، گواہوں کی شہادتیں اور دیگر شواہد مجموعی طور پر جرم کی تصدیق کرتے ہیں۔ماریئس بورگ ہوئبی ناروے کی شہزادی میٹی میرٹ کے بیٹے ہیں، تاہم وہ براہِ راست شاہی جانشینی کی قطار میں شامل نہیں ہیں۔ اس کے باوجود شاہی خاندان سے تعلق کے باعث یہ کیس ملکی اور بین الاقوامی میڈیا میں خاصی توجہ کا مرکز رہا۔عدالتی فیصلے کے بعد ناروے کے شاہی محل کی جانب سے فوری طور پر کوئی تفصیلی ردعمل سامنے نہیں آیا۔ تاہم مبصرین کے مطابق یہ واقعہ شاہی خاندان کے لیے ایک حساس اور مشکل صورتحال کی نمائندگی کرتا ہے۔
