لاء کمیشن کے پاس فنڈز موجود تھے لیکن وہ ضلعی عدلیہ کی بہتری کے لئے مؤثر طور پر استعمال نہیں ہو سکے: چیف جسٹس یحییٰ آفریدی
ہر صوبے میں ایک سینئر نمائندہ تعینات کیا جائیگا جو ہائی کورٹ میں بیٹھے گا، انصاف کے منصوبوں کی نگرانی کیلئے رابطہ کار کے طور پر کام کریگا:کمیشن کا فیصلہ
کوئٹہ(آن لائن)چیف جسٹس آف پاکستان نے سپریم کورٹ برانچ رجسٹری کوئٹہ میں بار ایسوسی ایشنز اور لاء اینڈ جسٹس کمیشن کے درمیان تعاون کا جائزہ لینے اور اسے مزید مضبوط بنانے کے لیے اجلاس کی صدارت کی چیف جسٹس یحییٰ آفریدی، اور چیئرمین، لاء اینڈ جسٹس کمیشن آف پاکستان (LJCP) نے پیر کو سپریم کورٹ برانچ رجسٹری کوئٹہ میں ایک اعلیٰ سطحی اجلاس کی صدارت کی۔ اجلاس کا مقصد بلوچستان صوبے کی بار ایسوسی ایشنز اور لاء اینڈ جسٹس کمیشن آف پاکستان کے درمیان ادارہ جاتی روابط کا جائزہ لینا اور انصاف کی فراہمی کو بہتر بنانا تھا۔۔چیف جسٹس آف پاکستان نے شرکاء کو خوش آمدید کہتے ہوئے انصاف کے شعبے میں ان کے کلیدی کردار کو سراہا۔ انہوں نے آگاہ کیا کہ انہوں نے ہر صوبے کے دور افتادہ اضلاع کا دورہ کیا اور بار ایسوسی ایشنز اور لاء اینڈ جسٹس کمیشن کے درمیان روابط میں خلا پایا، حالانکہ لاء کمیشن کے پاس فنڈز موجود تھے لیکن وہ ضلعی عدلیہ کی بہتری کے لیے مؤثر طور پر استعمال نہیں ہو سکے۔ بار ایسوسی ایشنز کی ترقیاتی منصوبوں کے لیے فنڈنگ کی ضرورت ہے کیونکہ وہ عدالتی کمپلیکسز میں شامل ہیں۔ چونکہ لاء کمیشن کی رسائی محدود ہے، اس لیے کمیشن نے فیصلہ کیا ہے کہ ہر صوبے میں ایک سینئر سطح کے نمائندے کو تعینات کیا جائے گا جو ہائی کورٹس میں بیٹھیں گے۔ یہ نمائندگان ضلعی بار ایسوسی ایشنز میں آگاہی بڑھانے، مقامی ترجیحی شعبوں کی نشاندہی کرنے اور جڑوں کی سطح پر جاری انصاف کے منصوبوں کی نگرانی کے لیے رابطہ کار کے طور پر کام کریں گے۔ بارز اپنے ترقیاتی منصوبے ضلعی ترقیاتی کمیٹیوں کے سامنے پیش کر سکتی ہیں۔ مزید برآں، وفاقی اور صوبائی ترقیاتی محکموں کے نمائندے بھی منصوبوں کی بروقت تکمیل اور وسائل کے دہرے استعمال سے بچاؤ کو یقینی بنانے کے لیے شامل کیے گئے ہیں۔چیف جسٹس نے ہم آہنگی کی اہمیت پر زور دیتے ہوئے بار نمائندوں پر زور دیا کہ وہ اپنی متعلقہ بار ایسوسی ایشنز کو ان پیش رفتوں کے بارے میں حساس بنائیں اور ان اصلاحاتی اقدامات میں فعال طور پر شریک ہوں‘چیف جسٹس نے اعلان کیا کہ لاء اینڈ جسٹس کمیشن آف پاکستان کے زیرِ اہتمام ایک نیا اقدام شروع کیا گیا ہے جس کے تحت غریب سائلین کو ریاست کے خرچ پر قانونی نمائندگی فراہم کی جائے گی، جو مجسٹریٹ عدالتوں سے لے کر سپریم کورٹ تک تمام سطحوں پر دستیاب ہوگی۔ ضلعی قانونی بااختیاری کمیٹیوں کے ذریعے وکلاء کو 50,000 روپے تک معاوضہ دیا جائے گا۔ اس کا مقصد تمام شہریوں کے لیے انصاف تک مساوی رسائی کو یقینی بنانا ہے۔ بار ایسوسی ایشنز اس مقصد کے لیے اہل وکلاء کو ضلعی ججوں، ہائی کورٹس اور سپریم کورٹ آف پاکستان کو نامزد کر سکتی ہیں۔چیف جسٹس نے بار نمائندوں کی حوصلہ افزائی کی کہ وہ اپنے ارکان کو فیڈرل جوڈیشل اکیڈمی کے جاری کردہ کنٹینیونگ لیگل ایجوکیشن (CLE) پروگرامز سے فائدہ اٹھانے کی ترغیب دیں۔ انہوں نے ہدایت کی کہ تربیتی کیلنڈر کو بار ایسوسی ایشنز میں وسیع پیمانے پر تقسیم کیا جائے تاکہ پیشہ ورانہ ترقی کو فروغ دیا جا سکے
