لاہور کے علاقے مغلپورہ میں ایک دلخراش واقعہ پیش آیا، جہاں ایک خاتون کو معمولی تلخ کلامی پر فائرنگ کرکے قتل کر دیا گیا۔
مقتولہ کی شناخت مصباح کے نام سے ہوئی ہے، جو اپنے گھر کے باہر قتل کی گئی۔ پولیس کے مطابق، اس قتل کے ملزمان ایک باپ اور بیٹا تھے، جن کی شناخت شیراز اور اس کے بیٹے عبدالرحمان کے طور پر ہوئی ہے۔ڈی آئی جی انویسٹی گیشن، ذیشان اصغر، نے واقعے کا فوری نوٹس لیا اور پولیس ٹیم کو ملزمان کو گرفتار کرنے کا ٹاسک دیا۔ انچارج انویسٹی گیشن مغلپورہ، وقاص احمد کی قیادت میں پولیس نے سی سی ٹی وی کیمروں کی مدد سے اور آئی ٹی ایکسپرٹس کی ٹیم کی معاونت سے ملزمان کو گرفتار کیا۔ پولیس کے مطابق، ملزمان نے قتل کے بعد فوراً موقع واردات سے فرار ہونے کی کوشش کی تھی، لیکن جدید تکنیکی وسائل کے استعمال کی بدولت انہیں گرفتار کر لیا گیا۔
پولیس نے ملزمان سے آلہ قتل بھی برآمد کر لیا ہے اور انہیں قانونی کارروائی کے لیے تھانے منتقل کر دیا ہے۔ ڈی آئی جی انویسٹی گیشن ذیشان اصغر نے کہا کہ لاہور کی انویسٹی گیشن پولیس کی جرائم پیشہ عناصر کے خلاف کارروائیاں جاری رہیں گی۔ ایس ایس پی انویسٹی گیشن، محمد نوید نے اس کامیاب کارروائی پر پولیس ٹیم کی تعریف کی اور ان کے لیے تعریفی اسناد کا اعلان کیا۔
