بھاٹی گیٹ میں ڈاکوؤں کا پولیس اہلکار اور دوست پر حملہ، دونوں زخمی

لاہور کے علاقے بھاٹی گیٹ میں ایک افسوسناک واردات کے دوران ڈاکوؤں نے پولیس اہلکار اور اس کے دوست کو لوٹ لیا اور مزاحمت کرنے پر دونوں کو زخمی کر دیا۔

تفصیلات کے مطابق عباس پولیس لائنز میں تعینات کانسٹیبل کاشف رزاق اپنے دوست نادر علی کے ساتھ فیملی پارک میں موجود تھا کہ اسی دوران نامعلوم ڈاکو وہاں پہنچے اور انہیں لوٹنے کی کوشش کی۔ ڈاکوؤں نے پہلے نقدی اور قیمتی اشیاء چھیننے کی کوشش کی۔مزاحمت کرنے پر ملزمان نے کانسٹیبل کاشف رزاق اور اس کے دوست نادر علی پر چھری سے حملہ کر دیا، جس کے نتیجے میں دونوں افراد زخمی ہو گئے۔ واردات کے دوران ڈاکوؤں نے کانسٹیبل سے 25 ہزار روپے نقدی اور اس کا پولیس سروس کارڈ بھی چھین لیا اور موقع سے فرار ہو گئے۔

پولیس کے مطابق واقعے کا مقدمہ کانسٹیبل کاشف رزاق کی مدعیت میں درج کر لیا گیا ہے اور ملزمان کی تلاش کے لیے علاقے میں چھاپے مارے جا رہے ہیں۔یہ واقعہ شہر کے مصروف علاقے بھاٹی گیٹ  میں پیش آیا، جو پرانے لاہور کا ایک اہم داخلی دروازہ اور تجارتی و رہائشی سرگرمیوں کا مرکز سمجھا جاتا ہے۔پولیس حکام کا کہنا ہے کہ سی سی ٹی وی فوٹیج اور مقامی مخبروں کی مدد سے ملزمان کی شناخت کی کوشش کی جا رہی ہے تاکہ انہیں جلد گرفتار کیا جا سکے۔