ویب ڈیسک: پاکستان ڈرامہ انڈسٹری کی ابھرتی ہوئی باصلاحیت اداکارہ نورے ذیشان نے اپنی ذاتی زندگی سے جڑی ایک دردناک حقیقت سے پردہ اٹھا کر مداحوں کے دل جیت لیے۔
اداکارہ، جو ان دنوں مقبول ڈرامہ "پرورش" میں آنیا کا کردار ادا کر رہی ہیں، حال ہی میں ایک ٹی وی پروگرام کی مہمان بنیں، جہاں انہوں نے اپنے ماضی کے ایک ناخوشگوار تجربے کے بارے میں کھل کر بات کی۔نورے نے بتایا کہ وہ بچپن میں اسکول میں شدید بُلیئنگ کا شکار رہیں۔ ان کے مطابق:"جب میں اسکول بس میں جاتی تھی تو کچھ بچے جان بوجھ کر میرے جوتوں پر پاؤں رکھتے تاکہ میرا یونیفارم خراب ہو جائے اور مجھے سزا ملے۔ ایک دن میرے دوپٹے پر سیاہی پھینکی گئی اور پھر ایک لڑکے نے مجھے زور سے دھکا دے کر زمین پر گرا دیا۔ یہ سب آٹھویں سے دسویں جماعت کے بچے کرتے تھے۔"اداکارہ نے یہ بھی انکشاف کیا کہ وہ خوف اور شرمندگی کے باعث کبھی بھی اپنے اہلِ خانہ سے یہ بات شیئر نہ کر سکیں:"مجھے ڈر تھا کہ گھر والے یا تو ناراض ہوں گے یا میری بات کا یقین نہیں کریں گے، اس لیے میں نے برسوں یہ اذیت خاموشی سے جھیلی۔"
سوشل میڈیا پر ہمدردی اور تعریف
نورے کے اس انکشاف پر سوشل میڈیا صارفین نے ان کی جرات کو سراہا اور انہیں حقیقت کے قریب اداکاری کا باعث قرار دیا۔ مداحوں کا کہنا تھا کہ نورے جیسے فنکار جب حساس موضوعات پر آواز بلند کرتے ہیں تو یہ معاشرے میں آگہی اور تبدیلی کا ذریعہ بنتا ہے۔ایک صارف نے لکھا:"نورے کی باتیں ہر اس بچے کی آواز ہیں جو آج بھی اسکول میں بُلیئنگ کا شکار ہے، ہمیں اس پر سنجیدگی سے سوچنا چاہیے۔"ایک اور صارف نے کہا:"اداکاری میں حقیقت کا عکس اسی وقت آتا ہے جب فنکار خود زندگی کے کٹھن تجربات سے گزرے ہوں، نورے کی پرفارمنس اسی لیے اتنی پراثر ہے۔"
