لاہور کے علاقے ماڈل ٹاؤن میں پولیس نے ایک سفاک خاتون نازیہ بی بی کو گرفتار کر لیا ہے، جس پر الزام ہے کہ اس نے اپنے پہلے شوہر اشتیاق کو قتل کیا اور اپنے دوسرے شوہر اشفاق کو قتل کرنے کی کوشش کی۔
ایس پی ماڈل ٹاؤن جہانداد اکرم کے مطابق، گرفتاری جدید ٹیکنالوجی اور سی سی ٹی وی فوٹیج کی مدد سے عمل میں آئی۔ نازیہ نے اپنے آشنا دانش کے ساتھ مل کر اپنے پہلے شوہر کو پیسوں کے لالچ میں قتل کیا اور اس کے بعد دوسری شادی کر لی۔پولیس کے مطابق، نازیہ اور دانش نے دوسرے شوہر اشفاق کو بھی قتل کرنے کی منصوبہ بندی کی۔ گزشتہ روز نازیہ نے دانش کے ذریعے اپنے شوہر پر فائرنگ کرائی، اور واقعہ کو ڈکیتی کی مزاحمت کے طور پر پیش کرنے کی کوشش کی۔ سی سی ٹی وی فوٹیج میں دانش کو فائرنگ کے لیے جاتے ہوئے دیکھا جا سکتا ہے۔گرفتار ملزمان نازیہ اور دانش کے خلاف مقدمہ درج کر لیا گیا ہے اور تحقیقات جاری ہیں۔ پولیس نے شہریوں سے درخواست کی ہے کہ وہ ایسے مشکوک عناصر کی اطلاع فوری طور پر متعلقہ تھانے کو دیں تاکہ مزید جرائم روکے جا سکیں۔
