ایران ، اسرائیل کشیدگی: ایشیائی سٹاک مارکیٹس میں مندی

سنگاپور سٹی (آئی این پی )مشرقِ وسطیٰ میں ایران اور اسرائیل کے درمیان جاری کشیدگی کا عالمی مالیاتی منڈیوں پر بھی اثر دیکھا گیا ، ایشیائی سٹاک مارکیٹس میں شدید مندی دیکھی گئی جبکہ سرمایہ کاروں کی جانب سے محفوظ سرمایہ کاری کی تلاش میں سونے کی عالمی قیمت میں نمایاں اضافہ ہوا ہے۔جاپان کی سٹاک مارکیٹ میں غیر یقینی صورتحال کے باعث نکئی انڈیکس میں ایک فیصد سے زائد کی کمی ریکارڈ کی گئی۔ اسی طرح جنوبی کوریا کے کوسپی انڈیکس میں بھی ایک فیصد سے زیادہ کی گراوٹ دیکھنے میں آئی۔ ادھر ہانگ کانگ کی ہینگ سینگ مارکیٹ بھی غیر یقینی عالمی سیاسی صورتحال کے زیراثر رہی اور انڈیکس میں ایک فیصد کے قریب کمی ریکارڈ کی گئی۔