سعودی ائیرلائن نے ریاض میں 500 سے زائد مسافروں کا سامان چھوڑ دیا، جس سے عمرہ زائرین اور دیگر مسافروں کو مشکلات کا سامنا.
تفصیلات کے مطابق، مسافروں میں بڑی تعداد عمرہ زائرین کی ہے جو پرواز SV 736 کے ذریعے ریاض سے لاہور پہنچے ہیں۔ ائیرلائن نے مسافروں اور عمرہ زائرین کو ہدایت کی ہے کہ وہ اپنا سامان دو روز بعد لاہور ائیرپورٹ پر آکر وصول کریں۔ مسافروں کی اکثریت پنجاب کے دوردراز شہروں سے تعلق رکھتی ہے، اور انہیں اپنے سامان کی عدم دستیابی پر شدید تشویش ہے۔ مسافروں کا کہنا ہے کہ وہ سینکڑوں میل سفر کرکے واپس آ چکے ہیں، اور اب سامان لینے کے لیے پھر سفر کرنا مشکل ہوگا۔
اس صورتحال پر مسافروں اور ائیرلائن کے عملے کے درمیان تلخ کلامی بھی ہوئی، جس کی تصدیق اے ایس ایف کو دی گئی ہے اور معاملے کی تحقیقات جاری ہیں۔ شہریوں کا مطالبہ ہے کہ فوری طور پر سامان کی فراہمی یقینی بنائی جائے اور اس قسم کے واقعات سے بچاؤ کے لیے سخت اقدامات کیے جائیں۔
