چالان پرموٹرسائیکل سوار آپے سے باہر

 مال روڈ پر شہری وارڈن سے الجھتے رہے، وائرلیس سیٹ چھیننے کی بھی کوشش،ملزم گرفتار، ساتھی فرار 
لاہور(کرائم رپورٹر)مال روڈ پر بغیر ہیلمٹ موٹرسائیکل سوار کا چالان ہونے پر آپے سے باہر ہوگیا۔ موٹرسائیکل سوار اور اس کے ساتھی نے چالان ہونے پر روڈ بلاک کر دیا اور احتجاج شروع کر دیا۔پولیس کے مطابق منع کرنے پر موٹرسائیکل سوار وں نے ٹریفک وارڈن سے الجھتے ہوئے وائرلیس سیٹ چھیننے کی کوشش کی جس پر زبیر غفور نامی ملزم کو موقع پر گرفتار کر لیا گیا جبکہ اس کا ساتھی فرار ہونے میں کامیاب ہو گیا، بعد ازاں موٹرسائیکل سوار کے خلاف تھانہ ریس کورس میں ہنگامہ آرائی، تشدد اور کارسرکار میں مداخلت پر مقدمہ درج کر کے فرار ہونے والے ملزم کی تلاش شروع کر دی گئی۔اس واقعہ پر سی ٹی او لاہور عمارہ اطہر نے کہا کہ قانون ہاتھ میں لینے والوں سے سختی سے نمٹا جائے گا۔ ساتھ ہی انہوں نے شہریوں کو اپنی اور دوسروں کی حفاظت کیلئے ہیلمٹ پہننے کی اہمیت پر زور دیا۔