لاہور،میٹرک رزلٹ ، بڑی غلطی،عافیہ نعیم ری چیکنگ کے بعد تیسری پوزیشن پر آگئیں

طالبہ کے پہلے درج شدہ 1187 نمبروں کے بجائے اب مجموعی نمبر 1189 ہوگئے
 ایک پرچے کی مارکنگ کے وقت ایگزامینر کی جانب سے 2 نمبر شمار کرنا رہ گئے تھے
واقعے نے امتحانی نتائج کی تیاری اور نمبروں کی جانچ کے طریقہ کار پر بھی سوالات اٹھا دیے ہیں
لاہور(آئی  این پی )  لاہور میں میٹرک امتحانات کے نتائج کے بعد ایک طالبہ کی جانب سے ری چیکنگ کی درخواست نے امتحانی نظام کی بڑی غلطی واضح کر دی۔تفصیل کے مطابق لاہور کے ایک نجی اسکول کی طالبہ عافیہ نعیم نے میٹرک امتحانات میں 1187 نمبر حاصل کیے، تاہم انہیں اپنے حاصل کردہ نمبروں پر تحفظات تھے۔طالبہ کو توقع تھی کہ ان کے نمبر اس سے زیادہ ہوں گے، جس پر انہوں نے لاہور تعلیمی بورڈ میں ری چیکنگ کی درخواست جمع کرائی۔ری چیکنگ کے عمل کے دوران سامنے آیا کہ عافیہ نعیم کے نمبروں کی مجموعی تعداد میں غلطی ہوئی تھی۔ امتحانی طریقہ کار کے مطابق ری چیکنگ میں جوابی کاپی کی دوبارہ مارکنگ نہیں کی جاتی بلکہ نمبروں کے اندراج اور مجموعی تعداد کی دوبارہ جانچ کی جاتی ہے۔دوبارہ کیلکولیشن کے دوران معلوم ہوا کہ ایک پرچے کی مارکنگ کے وقت ایگزامینر کی جانب سے 2 نمبر شمار کرنا رہ گئے تھے۔ اس غلطی کی تصحیح کے بعد عافیہ نعیم کے مجموعی نمبروں میں 2 نمبر کا اضافہ کردیا گیا۔یوں طالبہ کے پہلے درج شدہ 1187 نمبروں کے بجائے اب ان کے مجموعی نمبر 1189 ہوگئے ہیں۔ اضافی نمبروں کے بعد عافیہ نعیم لاہور تعلیمی بورڈ کے میٹرک امتحانات میں تیسری پوزیشن کی حقدار بن گئی ہیں۔واقعے نے امتحانی نتائج کی تیاری اور نمبروں کی جانچ کے طریقہ کار پر بھی سوالات اٹھا دیے ہیں، تاہم ری چیکنگ کے ذریعے غلطی سامنے آنے کے بعد طالبہ کو ان کا جائز حق مل گیا ہے۔لاہور تعلیمی بورڈ کی جانب سے عافیہ نعیم کو تیسری پوزیشن کا اعزاز دینے کیلئے الگ تقریب منعقد کرنے کا فیصلہ کیا گیا ہے۔