بلوچستان، ضلع سوراب کی تاریخ میں پہلی بار خواتین کیلئے گرینڈ کھلی کچہری

ڈپٹی کمشنرنے بجلی، گیس، تعلیم، صحت اور صاف پانی سمیت مختلف مسائل غور سے سنے
   خواتین کی شکایات و تجاویز کو بھی ترجیحی بنیادوں پر حل کیا جائے گا، صاحبزادہ نجیب اللہ 
کوئٹہ(آئی این پی ) بلوچستان کے ضلع سوراب کی تاریخ میں پہلی بار خواتین کے لئے  گرینڈ کھلی کچہری کا انعقاد کیا گیا جس کی صدارت ڈپٹی کمشنر سوراب
 صاحبزادہ نجیب اللہ نے کی۔کھلی کچہری میں ایف سی بلوچستان 61 ونگ کے کمانڈر کرنل سید فخر رفیق طلحہ، ایڈیشنل ڈپٹی کمشنر سلمان علی بلیدی، اسسٹنٹ کمشنر اکبر علی، ڈی ایس پی بلاول سمیت مختلف محکموں کے ضلعی افسران نے شرکت کی۔ کھلی کچہری میں اساتذہ، طالبات اور سیکڑوں خواتین نے شرکت کی اور اپنے مسائل ضلعی انتظامیہ کے سامنے پیش کیے۔ خواتین کی جانب سے بجلی، گیس، بینظیر انکم سپورٹ پروگرام (بی آئی ایس پی )، بینظیر انکم نشوونما پروگرام، فیملی پارک، پبلک لائبریری، شاپنگ سینٹر، تعلیم، صحت، نادرا اور صاف پانی سمیت دیگر بنیادی سہولیات سے متعلق مسائل اور مطالبات پیش کیے گئے۔اس موقع پر ڈپٹی کمشنر صاحبزادہ نجیب اللہ نے خواتین کے مسائل غور سے سنے اور متعلقہ محکموں کے افسران کو سائلین کی درخواستوں پر فوری کارروائی اور مسائل کے حل کے لیے ضروری اقدامات کی ہدایات جاری کیں۔ڈپٹی کمشنر کا کہنا تھا کہ خواتین کے مسائل کا حل اور انہیں بنیادی سہولیات کی فراہمی ضلعی انتظامیہ کی ترجیحات میں شامل ہے۔ عوامی مسائل کے حل کیلئے  تمام دستیاب وسائل بروئے کار لائے جا رہے ہیں اور خواتین کی شکایات و تجاویز کو بھی ترجیحی بنیادوں پر حل کیا جائے گا۔انہوں نے کہا کہ  بی ایس ڈی آئی  کے تحت سوراب کی ترقی اور عوامی مسائل کے حل کے لئے   عملی اقدامات کا سلسلہ جاری رہے گا، جبکہ ضلعی انتظامیہ عوام کو درپیش مسائل کے فوری ازالے کیلئے  متعلقہ اداروں کے ساتھ مل کر کام کرے گی۔