وزیراعظم شہباز شریف نے کہا ہے کہ موجودہ حکومت نے انتہائی مشکل حالات میں ملک کی باگ ڈور سنبھالی، لیکن ہم نے نہ صرف ذمہ داری قبول کی بلکہ متحد ہو کر آگے بڑھنے کا عزم کیا۔
ان کا کہنا تھا کہ 2023 میں اکثریت کو خدشہ تھا کہ پاکستان دیوالیہ ہو جائے گا، لیکن ہماری محنت اور پختہ ارادے نے ملک کو اس انجام سے بچا لیا۔وزیراعظم نے یہ بات پاکستان سمر اسکالرز انٹرن شپ پروگرام کے تحت منتخب طلباء سے اسلام آباد میں خطاب کرتے ہوئے کہی۔ انہوں نے نوجوانوں سے خطاب میں کہا:"مشکل ترین فیصلوں کے باوجود ہم نے ثابت قدمی دکھائی۔ میں نے اس وقت بھی یقین رکھا کہ پاکستان ڈیفالٹ نہیں کرے گا، اور الحمدللہ آئی ایم ایف کے ساتھ معاہدے طے پا گئے اور ہم دیوالیہ ہونے سے بچ گئے۔"
معاشی اشاریوں میں بہتری
وزیراعظم نے معیشت کے حوالے سے اطمینان کا اظہار کرتے ہوئے کہا کہ:"موثر اقتصادی اقدامات کے باعث معیشت کے اشاریے بہتری کی جانب گامزن ہیں۔""پالیسی ریٹ کم ہو کر 11 فیصد پر آ گیا ہے، جو ایک خوش آئند علامت ہے۔""آئندہ پالیسی ریٹ میں مزید کمی سے کاروباری سرگرمیوں کو فروغ ملے گا اور لوگ بینکوں میں پڑا سرمایہ نکال کر مارکیٹ میں لگائیں گے۔"
نوجوانوں سے امیدیں
وزیراعظم شہباز شریف نے طلباء سے خطاب کے دوران انہیں ملک کا روشن مستقبل قرار دیتے ہوئے کہا کہ:"یہ ملک آپ کا ہے، آپ نے ہی اسے سنوارنا ہے۔ ہم نے اپنی محنت سے حالات کو سدھارا ہے، اب آپ نے اسے بلندیوں پر لے جانا ہے۔"انہوں نے طلباء کو تلقین کی کہ وہ تعلیم، تحقیق اور قومی خدمت کو اپنا مشن بنائیں، کیونکہ پاکستان کی ترقی کا دار و مدار نوجوان نسل کی صلاحیتوں پر ہے۔
