صدرِ مملکت آصف علی زرداری اور وزیراعظم محمد شہباز شریف نے بانی پاکستان قائداعظم محمد علی جناح کے 77 ویں یوم وفات پر انہیں خراج عقیدت پیش کیا۔
صدر زرداری کا پیغام:
صدر آصف علی زرداری نے کہا کہ قائداعظم نے برصغیر کے مسلمانوں کے لیے آزاد وطن قائم کیا اور انہیں وقار، شناخت اور خودداری دی۔ انہوں نے عوام پر زور دیا کہ وہ قائد کے انصاف، مساوات، رواداری اور جمہوریت کے وژن سے رہنمائی حاصل کریں۔بھارت میں اقلیتوں کے حقوق کی پامالی کا ذکر کرتے ہوئے صدر نے کہا کہ پاکستان کا قیام ناگزیر اور جائز تھا۔صدر نے کہا کہ آج پاکستان کو اقتصادی مشکلات، ماحولیاتی تبدیلی، انتہاپسندی اور ادارہ جاتی اصلاحات جیسے چیلنجز کا سامنا ہے، اور قوم کو قائداعظم اور تحریک پاکستان کے رہنماؤں کے نقشِ قدم پر چلنا چاہیے۔
وزیراعظم شہباز شریف کا پیغام:
وزیراعظم نے قائداعظم کی بے مثال قیادت اور پاکستان کے قیام میں ان کی جدوجہد کو سراہا۔انہوں نے کہا کہ قائداعظم نے مسلمانوں کے سیاسی، مذہبی، معاشی اور ثقافتی حقوق کے تحفظ کے لیے بھرپور جدوجہد کی، اور یہی جدوجہد پاکستان کی صورت میں کامیاب ہوئی۔تقسیمِ ہند کے وقت درپیش کٹھن چیلنجز کے باوجود قائداعظم نے مضبوط پاکستان کی بنیاد رکھی۔وزیراعظم نے کہا کہ قائداعظم کا تصورِ پاکستان مذہبی آزادی، مساوی حقوق، جمہوریت، انصاف اور اقلیتوں کے تحفظ پر مبنی تھا، اور ان کی سیاسی میراث پاکستان کی ترقی اور فلاح کا راز ہے۔
