ترکیہ کے صدر رجب طیب اردوان 12 فروری 2025 کو دو روزہ سرکاری دورے پر پاکستان پہنچیں گے۔
اس دورے کے دوران، وہ وزیر اعظم شہباز شریف اور صدر آصف علی زرداری سے ملاقاتیں کریں گے۔ دونوں ممالک کے درمیان اعلیٰ سطحی اسٹریٹجک تعاون کونسل (ایچ ایل ایس سی سی) کے ساتویں اجلاس کی مشترکہ صدارت بھی کی جائے گی۔ اجلاس کے اختتام پر مشترکہ اعلامیہ جاری ہونے اور مختلف معاہدوں اور مفاہمتی یادداشتوں پر دستخط کی توقع ہے۔اس دورے میں دوطرفہ تعلقات، تجارتی تعاون، اور مختلف شعبوں میں شراکت داری پر تبادلہ خیال کیا جائے گا۔ اس کے علاوہ، علاقائی اور عالمی امور، بشمول غزہ کی صورتحال، پر بھی بات چیت متوقع ہے۔ ترک صدر کی عسکری قیادت سے ملاقات کا بھی امکان ہے۔
ترکیہ کے کمیونیکیشنز کے ڈائریکٹر فریہتین آلتن کے مطابق، صدر اردوان اس دورے کے دوران میزبان ممالک کے کاروباری رہنماؤں سے بھی ملاقات کریں گے اور دوطرفہ تعلقات کے قانونی فریم ورک کو مضبوط بنانے کے لیے معاہدوں پر دستخط متوقع ہیں۔یہ دورہ پاکستان اور ترکیہ کے درمیان تعلقات کو مزید مستحکم کرنے اور مختلف شعبوں میں تعاون کو فروغ دینے میں اہم کردار ادا کرے گا۔
