امریکی صدر ڈونلڈ ٹرمپ نے اسرائیلی وزیراعظم بنیامین نیتن یاہو کے ساتھ اپنے تعلقات کو بہت اچھا قرار دیتے ہوئے کہا ہے کہ غزہ کے معاملے پر دونوں رہنماؤں کے درمیان اختلافات کے باوجود باہمی تعلقات متاثر نہیں ہوئے۔
غیر ملکی خبر رساں ادارے اے ایف پی کے مطابق، صدر ٹرمپ نے پیر کے روز اوول آفس میں ایک تقریب کے اختتام پر صحافی کے سوال کا جواب دیتے ہوئے کہا کہ نیتن یاہو کے ساتھ ان کے تعلقات "بہت اچھے" ہیں۔یہ بیان ایسے وقت میں سامنے آیا ہے جب گزشتہ ایک ہفتے سے غزہ کی صورتحال اور جنگ کے مستقبل سے متعلق ان کے اور اسرائیلی وزیراعظم کے درمیان اختلافات نمایاں ہو رہے تھے۔اسرائیلی وزیراعظم بنیامین نیتن یاہو نے اتوار کے روز واضح طور پر امریکی قیادت میں پیش کیے گئے غزہ منصوبے کی مخالفت کی تھی۔ اس مجوزہ منصوبے کے تحت اسرائیل کو غزہ میں اپنی فوجی موجودگی کم کرنا تھی، اور حماس کی جانب سے غیر مسلح ہونے کا عمل بھی آگے بڑھایا جانا تھا۔نیتن یاہو نے اس منصوبے کی مخالفت کرتے ہوئے اسرائیل کے سکیورٹی مفادات اور غزہ میں حماس کے خلاف کارروائی کے حوالے سے اپنا مؤقف برقرار رکھا۔
رپورٹ کے مطابق، گزشتہ ایک ہفتے کے دوران صدر ٹرمپ کی جانب سے اسرائیلی قیادت کے بعض اقدامات پر تنقید میں اضافہ ہوا تھا۔ اس کے باوجود، انہوں نے نیتن یاہو کے ساتھ اپنے ذاتی اور سیاسی تعلقات کو مضبوط قرار دیا ہے۔امریکی صدر کے تازہ بیان سے ظاہر ہوتا ہے کہ غزہ کے مستقبل، اسرائیلی فوجی کارروائیوں اور حماس کے معاملے پر دونوں حکومتوں کے درمیان پالیسی اختلافات کے باوجود، واشنگٹن اور تل ابیب کے درمیان قریبی تعلقات برقرار رکھنے کی کوشش کی جا رہی ہے۔
