کنگزمیڈ: جنوبی افریقا کے خلاف ٹیسٹ سیریز کے پہلے میچ کے ابتدائی روز آسٹریلیا کی بیٹنگ لائن مشکلات کا شکار رہی، تاہم میٹ رینشا اور کپتان پیٹ کمنز کی ذمہ دارانہ بیٹنگ نے ٹیم کو مزید نقصان سے بچا لیا۔
کنگزمیڈ میں خراب روشنی کے باعث پہلے روز کھیل ختم ہونے تک آسٹریلیا نے 6 وکٹوں کے نقصان پر 164 رنز بنائے تھے۔ میٹ رینشا 46 رنز بنا کر ناٹ آؤٹ رہے، جبکہ پیٹ کمنز نے بھی ان کا بھرپور ساتھ دیا۔آسٹریلوی کپتان پیٹ کمنز نے ٹاس جیت کر پہلے بیٹنگ کا فیصلہ کیا، تاہم نِک میڈنسن کو اوپنر کے طور پر میدان میں اتارنے کا تجربہ کامیاب نہ ہوسکا۔ تقریباً دس سال بعد ٹیسٹ کرکٹ میں واپسی کرنے والے میڈنسن 33 گیندوں کا سامنا کرنے کے باوجود کوئی رن بنائے بغیر آؤٹ ہوگئے۔ ٹریوس ہیڈ بھی بڑی اننگز کھیلنے میں ناکام رہے۔مارنس لبوشین اور اسٹیون اسمتھ نے 60 رنز کی شراکت قائم کرکے آسٹریلوی اننگز کو سہارا دینے کی کوشش کی، لیکن دونوں بلے باز لنچ کے آس پاس پویلین واپس لوٹ گئے۔ اس کے بعد ایلکس کیری، بیو ویبسٹر اور دیگر بلے باز بھی جنوبی افریقی بولرز کے سامنے زیادہ دیر نہ ٹھہر سکے۔
جنوبی افریقا کی جانب سے مارکو جینسن، ویان مولڈر اور اینرک نورکیا نے دو، دو وکٹیں حاصل کیں۔ نورکیا نے ساڑھے تین سال بعد ٹیسٹ کرکٹ میں واپسی کرتے ہوئے نمایاں بولنگ کا مظاہرہ کیا۔دوسری جانب پانچویں نمبر پر بیٹنگ کے لیے آنے والے میٹ رینشا نے مشکل صورتحال میں ذمہ دارانہ کھیل پیش کیا۔ انہوں نے 115 گیندوں پر ناقابلِ شکست 46 رنز بنائے۔ کپتان پیٹ کمنز نے بھی وکٹ پر ان کا ساتھ دیا اور دونوں نے ناقابلِ شکست شراکت قائم کرکے ٹیم کی پوزیشن بہتر بنانے کی کوشش کی۔
خراب روشنی کے باعث پہلے روز کا کھیل ختم ہوا تو آسٹریلیا کی چھ وکٹیں گر چکی تھیں، تاہم رینشا اور کمنز کی مزاحمت نے ٹیم کو مزید وکٹیں گنوانے سے بچا لیا۔ اب دوسرے روز آسٹریلیا کی نظریں مجموعی اسکور میں اضافے اور جنوبی افریقا کے خلاف بہتر پوزیشن حاصل کرنے پر ہوں گی۔
