اسلام آباد : سعودی عرب سے پاکستانی حجاج کرام کی وطن واپسی کا عمل آج باضابطہ طور پر شروع ہو رہا ہے۔ اس سلسلے کی پہلی حج پرواز آج اسلام آباد انٹرنیشنل ایئرپورٹ پر پہنچے گی، جس میں مختصر دورانیے کا حج مکمل کرنے والے 307 عازمین سوار ہوں گے۔
وزارت مذہبی امور اور پاکستان کے حج مشن کے مطابق، حجاج کرام کی واپسی کا یہ مرحلہ وار آپریشن 10 جولائی 2025 تک جاری رہے گا، جس کے دوران ملک بھر کے مختلف شہروں میں عازمین حج کی واپسی کے لیے درجنوں پروازیں چلائی جائیں گی۔
ایئرپورٹس پر خصوصی انتظامات مکمل
اسلام آباد ایئرپورٹ پر حجاج کرام کے استقبال کے لیے خصوصی انتظامات کیے گئے ہیں۔ وزارت مذہبی امور، سول ایوی ایشن، امیگریشن، اور دیگر متعلقہ ادارے حاجیوں کو سہولیات فراہم کرنے کے لیے ہائی الرٹ پر ہیں۔ایئرپورٹ پر حاجیوں کے لیے خصوصی کاؤنٹرز، ویلکم ڈیسک، ایمبولینسز، اور سامان کی فوری کلیئرنس کا بندوبست کیا گیا ہے، تاکہ عازمین کو کسی قسم کی دقت کا سامنا نہ کرنا پڑے۔ حاجیوں کو گھروں تک پہنچانے کے لیے بھی ٹرانسپورٹ کا بندوبست موجود ہوگا۔
حج مشن کا بیان
پاکستانی حج مشن کے مطابق، رواں سال مختصر اور طویل دورانیے کے حج پروگرامز میں شرکت کرنے والے تمام حجاج کرام کو مرحلہ وار وطن واپس لایا جائے گا۔ تمام پروازیں شیڈول کے مطابق چلائی جائیں گی اور متعلقہ افسران حاجیوں کی رہنمائی اور سہولت کے لیے ایئرپورٹس پر موجود رہیں گے۔
