انگلینڈ نے بھارت کو چوتھے ٹی ٹوئنٹی میں یکطرفہ شکست دے کر پانچ میچوں کی سیریز اپنے نام کر لی۔
برسٹل میں کھیلے گئے میچ میں میزبان ٹیم نے 159 رنز کا ہدف صرف 13.5 اوورز میں ایک وکٹ کے نقصان پر حاصل کرتے ہوئے سیریز میں 0-3 کی ناقابلِ شکست برتری حاصل کر لی۔ یہ ٹی ٹوئنٹی کرکٹ کی تاریخ میں پہلا موقع ہے کہ انگلینڈ نے بھارت کے خلاف ٹی ٹوئنٹی سیریز جیتی ہے۔ہدف کے تعاقب میں انگلینڈ کے کپتان ہیری بروک نے جارحانہ بیٹنگ کا مظاہرہ کرتے ہوئے 35 گیندوں پر ناقابلِ شکست 79 رنز بنائے، جبکہ فل سالٹ نے 42 گیندوں پر 59 رنز کی عمدہ اننگز کھیلی۔ دونوں بلے بازوں نے دوسری وکٹ کے لیے ناقابلِ شکست 144 رنز کی شراکت قائم کر کے ٹیم کو یادگار فتح دلائی۔اس سے قبل بھارت نے پہلے بیٹنگ کرتے ہوئے مقررہ 20 اوورز میں 7 وکٹوں کے نقصان پر 158 رنز بنائے۔ کپتان شریاس ائیر نے 49 گیندوں پر ناقابلِ شکست 80 رنز کی ذمہ دارانہ اننگز کھیلی، تاہم دیگر بلے باز نمایاں کارکردگی دکھانے میں ناکام رہے۔ شیوام دوبے 22 رنز کے ساتھ دوسرے نمایاں اسکورر رہے۔
انگلینڈ کی جانب سے جوفرا آرچر اور جوش ٹنگ نے دو، دو وکٹیں حاصل کیں، جبکہ ول جیکس اور عادل رشید نے ایک، ایک کھلاڑی کو آؤٹ کیا۔یہ بھارت کی مکمل ہونے والے ٹی ٹوئنٹی مقابلوں میں مسلسل پانچویں شکست ہے، جس کے بعد ٹیم کی نئی قیادت پر سوالات اٹھنے لگے ہیں۔ ٹی ٹوئنٹی ورلڈ کپ جیتنے کے بعد سوریا کمار یادیو کی جگہ کپتان بنائے گئے شریاس ائیر کو مسلسل ناکامیوں کے باعث شدید دباؤ کا سامنا ہے۔واضح رہے کہ سیریز کا پہلا میچ بارش کے باعث بے نتیجہ ختم ہو گیا تھا، جبکہ سیریز کا پانچواں اور آخری میچ ہفتے کو ساؤتھیمپٹن میں کھیلا جائے گا۔
