یمن میں جاری بحران پر فوری سیاسی حل ناگزیر ہے، پاکستان کا اقوام متحدہ میں مؤقف

 اقوام متحدہ میں پاکستان کے مستقل مندوب عاصم افتخار احمد نے یمن میں جاری طویل بحران پر شدید تشویش کا اظہار کرتے ہوئے کہا ہے کہ یمن کے عوام برسوں سے سیاسی تقسیم، اقتصادی تباہی اور ماحولیاتی انحطاط جیسے شدید مسائل کا سامنا کر رہے ہیں، جو علاقائی اور عالمی امن و سلامتی کے لیے سنگین خطرہ ہیں۔

جامع مذاکرات اور عالمی اقدام پر زور
اقوام متحدہ کی سلامتی کونسل سے خطاب کرتے ہوئے پاکستانی مندوب نے کہا کہ یمن کی صورتحال فوری، اجتماعی اور تعمیری اقدامات کی متقاضی ہے۔ انہوں نے اس بات پر زور دیا کہ:"کشیدگی کو کم کرنے کے لیے جامع سیاسی مذاکرات ضروری ہیں، تاکہ انسانی، سیاسی اور سماجی و اقتصادی چیلنجز سے موثر انداز میں نمٹا جا سکے۔"
فلسطین کا تذکرہ
عاصم افتخار احمد نے مشرق وسطیٰ میں پائیدار امن کے تناظر میں غزہ کی صورتحال کا بھی حوالہ دیتے ہوئے کہا:"فلسطین میں فوری جنگ بندی اور دو ریاستی حل کے لیے بین الاقوامی قانونی اصولوں کے مطابق ٹھوس اور قابلِ اعتماد اقدامات ناگزیر ہیں۔"
قحط کے خطرے پر انتباہ
یمن میں قحط کے بڑھتے خطرے پر خبردار کرتے ہوئے انہوں نے عالمی برادری سے اپیل کی کہ وہ اقوام متحدہ کے او سی ایچ اے (OCHA) کی جانب سے کی گئی انسانی امداد کی اپیل پر فراخدلی سے تعاون کرے۔

سلامتی کونسل کے لیے اہم پیغام
پاکستانی مندوب نے کہا:"اقوام متحدہ کی سلامتی کونسل کو ایک مشترکہ اور واضح پیغام دینا ہوگا کہ یمن کے عوام امن، وقار، اور خوف، بھوک و مایوسی سے پاک مستقبل کے مستحق ہیں۔"انہوں نے کہا کہ پاکستان ہمیشہ علاقائی استحکام اور انسانی حقوق کے تحفظ کے لیے عالمی کوششوں کا حصہ رہا ہے اور یمن میں پائیدار حل کے لیے بھی تعمیری کردار ادا کرتا رہے گا۔