بالی وڈ کی مشہور اداکارہ شردھا کپور نے حال ہی میں سعودی عرب کے جدہ میں جاری ریڈ سی فلم فیسٹیول کے دوران ہالی وڈ کے مشہور اداکار اینڈریو گارفیلڈ کے ساتھ پوز دے کر مداحوں میں ہلچل مچا دی۔
یہ فیسٹیول عالمی سنیما کا جشن منانے کے لیے منعقد کیا گیا ہے، جس میں دنیا بھر سے مشہور فلمی شخصیات شرکت کر رہی ہیں۔شردھا کپور اور اینڈریو گارفیلڈ کی تصاویر سوشل میڈیا پر تیزی سے پھیل گئی ہیں اور مداحوں نے ان دونوں کی تصویر پر دلچسپ تبصرے کیے ہیں۔ شردھا کپور اس موقع پر رنگین چمکدار گاؤن میں نظر آئیں، جس میں وہ انتہائی دلکش دکھائی دے رہی تھیں۔ جبکہ اینڈریو گارفیلڈ گرے سوٹ میں ہینڈسم لگ رہے تھے۔ ان دونوں کی تصاویر کا اس فیسٹیول میں ایک منفرد اثر رہا ہے۔شردھا کپور اس وقت اپنی حالیہ فلم "استری 2" کی کامیابی پر بہت ساری تعریفیں حاصل کر رہی ہیں۔
"استری 2" بھارت کی تاریخ کی سب سے بڑی فلموں میں سے ایک بن چکی ہے اور شردھا کپور کے ادا کیے گئے چڑیل کے کردار کو خاصی پذیرائی ملی ہے۔ اس فلم میں شردھا کپور کے ساتھ اداکار راج کمار راؤ نے بھی اہم کردار ادا کیا اور وہ اس بار سر کٹے جن سے لڑتے نظر آئے۔ فلم کے دلچسپ ڈائیلاگ، سنسنی خیز مناظر اور مافوق الفطرت کہانی نے لاکھوں فلم بینوں کے دل جیت لیے اور ریلیز کے کئی ماہ بعد بھی اس فلم کا چرچا جاری ہے۔ریڈ سی فلم فیسٹیول میں شردھا کپور کے علاوہ بالی وڈ کی دیگر مشہور شخصیات جیسے کرینہ کپور خان، عامر خان، کرن راؤ اور دیگر بھی شرکت کر رہے ہیں۔ ان شخصیات کی شرکت سے فیسٹیول کی اہمیت اور بھی بڑھ گئی ہے، اور اس کی عالمی سنیما کے لیے اہمیت کو مزید اجاگر کیا گیا ہے۔
