لاہور کے علاقے چوہنگ میں دو موٹر سائیکلوں کے درمیان ہونے والے تصادم کے نتیجے میں ایک شخص جاں بحق جبکہ ایک زخمی ہوگیا۔
پولیس کے مطابق حادثہ چوہنگ کے علاقے میں پیش آیا، جہاں دو موٹر سائیکلیں آپس میں ٹکرا گئیں۔ حادثے کے نتیجے میں ثاقب خان اور سہیل زخمی ہوئے۔ دونوں کو فوری طور پر طبی امداد کے لیے ہسپتال منتقل کیا گیا۔زخموں کی شدت کے باعث ثاقب خان جانبر نہ ہوسکا اور دورانِ علاج دم توڑ گیا۔ پولیس نے جاں بحق ہونے والے شخص کی لاش ضروری قانونی کارروائی کے لیے مردہ خانے منتقل کر دی ہے۔دوسری جانب حادثے میں زخمی ہونے والے سہیل کو مزید طبی امداد کے لیے جناح ہسپتال منتقل کیا گیا، جہاں اس کا علاج جاری ہے۔پولیس کا کہنا ہے کہ حادثے کی وجوہات جاننے کے لیے مزید تحقیقات جاری ہیں۔ واقعے سے متعلق شواہد اکٹھے کیے جا رہے ہیں جبکہ حادثے کی مکمل وجوہات تحقیقات مکمل ہونے کے بعد سامنے آئیں گی۔
