وزیرِ اعظم شہباز شریف نے یومِ دستور کے موقع پر دستور کے معماروں کو خراجِ تحسین پیش کرتے ہوئے آئین کو عوام اور ریاست کے درمیان ایک مقدس معاہدہ قرار دیا ہے۔
وزیرِ اعظم نے اپنے پیغام میں کہا کہ آج قوم آئینِ اسلامی جمہوریہ پاکستان کی منظوری کا دن قومی جذبے کے ساتھ منا رہی ہے۔ ان کے مطابق آئین شہریوں کے حقوق و فرائض کا قانونی، اخلاقی اور انتظامی تعین کرتا ہے۔انہوں نے کہا کہ 10 اپریل 1973ء کو منظور ہونے والے متفقہ آئین نے پاکستان میں پارلیمانی جمہوری نظام کی بنیاد رکھی اور یہ تمام شہریوں کے بنیادی انسانی حقوق کا محافظ ہے۔
شہباز شریف کا مزید کہنا تھا کہ 1973ء کا آئین وفاقِ پاکستان اور قومی اتحاد کی درخشندہ علامت ہے جبکہ تمام ریاستی اکائیاں قومی یکجہتی اور معاشی ترقی کے لیے اپنا کردار ادا کر رہی ہیں اور روشن مستقبل کے لیے پرعزم ہیں۔انہوں نے یہ بھی کہا کہ اللہ تعالیٰ نے پاکستان کو جس عزت سے نوازا ہے اس پر ہم شکر گزار ہیں اور پاکستان عالمی برادری میں سربلند ہو کر ترقی و خوش حالی کا سفر جاری رکھے گا۔
