ایلون مسک نے وائٹ ہائوس کے تجارتی مشیر پیٹر نیرو کو احمق قرار دیدیا

 واشنگٹن (آئی این پی )امریکی صدر ڈونلڈ ٹرمپ کے ٹیرف پر ان کی اپنی کابینہ میں بھی لڑائیاں شروع ہوگئیں، ایلون مسک نے وائٹ ہائوس کے تجارتی مشیر پیٹر نیرو کو احمق قرار دیتے ہوئے کہا کہ اینٹوں کا ڈھیر بھی اس سے زیادہ عقلمند ہوتا ہے۔غیرملکی میڈیارپورٹس کے مطابق ٹیسلا کے بانی ایلون مسک اور وائٹ ہائوس کے تجارتی مشیر پیٹر نیرو کے درمیان تلخ جملوں کا تبادلہ ہوا، جس نے واشنگٹن کی سیاسی فضا کو مزید کشیدہ بنا دیا ہے۔ایلون مسک نے پیٹر نیرو پر شدید تنقید کرتے ہوئے انہیں احمق قرار دیا۔جواب میں پیٹر نیرو نے ایلون مسک کو تنقید کا نشانہ بنایا اور کہا کہ ایلون صرف گاڑیاں بیچتے ہیں، انہیں صرف اپنے کاروبار کی فکر ہے، انہیں ٹیرف یا بین الاقوامی تجارت کی کوئی سمجھ بوجھ نہیں۔