وفاقی وزیر تعلیم اور ایم کیو ایم پاکستان کے سربراہ خالد مقبول صدیقی نے اسلام آباد میں پریس کانفرنس کرتے ہوئے کہا کہ تعلیم اور روزگار کے شعبے میں پاکستان ابھی بہت پیچھے ہے اور ان شعبوں میں اصلاحات کی ضرورت ہے۔
ان کا کہنا تھا کہ وفاقی حکومت اسکولوں میں تکنیکی تعلیم کا آغاز کرنے پر توجہ دے گی تاکہ نوجوانوں کو عملی زندگی میں کامیاب ہونے کے لیے ضروری ہنر سیکھنے کا موقع مل سکے۔خالد مقبول صدیقی نے اس بات کا بھی ذکر کیا کہ تعلیم کا مقصد صرف کتابی علم نہیں، بلکہ اس کا مقصد معاشرتی ترقی، فرد کی صلاحیتوں میں اضافہ، اور ملک کی اقتصادی ترقی میں حصہ ڈالنا ہے۔ انہوں نے کہا کہ خواتین کی تعلیم پر خصوصی توجہ دی جائے گی کیونکہ ایک تعلیم یافتہ خاتون نہ صرف اپنے خاندان کی ترقی کا باعث بنتی ہے بلکہ پورے معاشرے کی ترقی میں اہم کردار ادا کرتی ہے۔وفاقی وزیر نے اعلان کیا کہ انٹرنیشنل کانفرنس برائے مسلم خواتین، چیلنجز اور مواقع کے نام سے ایک تعلیمی کانفرنس منعقد کی جائے گی جس میں وزرائے اعلیٰ اور چاروں صوبوں کے وزرائے تعلیم بھی شریک ہوں گے۔
اس کانفرنس کا مقصد خواتین کی تعلیم کے مسائل اور اس کے حل پر بات چیت کرنا ہے، تاکہ خواتین کی تعلیم کو مزید فروغ دیا جا سکے اور ان کے لیے نئے مواقع پیدا کیے جا سکیں۔انہوں نے افغان معاشرتی روایات کی قدر کرتے ہوئے افغان حکومت کو اس کانفرنس میں شرکت کی دعوت دی ہے، تاکہ دونوں ممالک کے درمیان تعلیم اور ثقافت کے حوالے سے مزید بات چیت کی جا سکے اور ایک دوسرے کے تجربات سے فائدہ اٹھایا جا سکے۔خالد مقبول صدیقی نے اس بات پر زور دیا کہ پاکستان کی تعلیمی پالیسی میں بہتری لانے کی ضرورت ہے اور اس کے لیے وفاقی حکومت تمام صوبوں کے ساتھ مل کر کام کرے گی تاکہ ہر بچے کو تعلیم کے برابر مواقع فراہم کیے جا سکیں۔
