حکومت اختیار رکھتی ہے تو عمران خان سے ملاقات کرائی جائے:عمر ایوب

اسلام آباد میں پی ٹی آئی رہنما عمر ایوب نے حکومت کے رویے پر تنقید کرتے ہوئے کہا کہ اگر حکومت واقعی اختیار رکھتی ہے، تو عمران خان سے ملاقات کرانی چاہیے۔

 صحافیوں سے گفتگو کرتے ہوئے انہوں نے وضاحت دی کہ ان کے تین اہم مطالبات ہیں جن میں 9 مئی اور 26 مئی کے واقعات پر جوڈیشل کمیشن کی تشکیل اور پارٹی کارکنان کی رہائی شامل ہیں۔ عمر ایوب نے کہا کہ پارٹی رہنماؤں نے بانی پی ٹی آئی عمران خان سے ملاقات کی درخواست کی تھی، لیکن ملاقات کرانے میں حکومتی ذرائع نے بے بسی ظاہر کی۔انہوں نے مزید کہا کہ حکومتی موقف کے مطابق ملاقات جیل کے مینوئل میں شامل نہیں ہے، جسے وہ حکومتی وعدوں سے انحراف قرار دیتے ہیں۔ ان کا کہنا تھا کہ اگر حکومت کو واقعی اختیار ہے تو وہ عمران خان سے ملاقات کرائے، اور اس ملاقات کو مذاکرات کا حصہ بنایا جائے تاکہ موجودہ سیاسی بحران کو حل کرنے کی سمت مل سکے۔

عمر ایوب نے حکومت پر الزام عائد کیا کہ وہ ملاقات کے معاملے میں ٹال مٹول سے کام لے رہی ہے، حالانکہ ان کی پارٹی کے مطالبات مذاکرات کے لیے اہم ہیں۔ پی ٹی آئی رہنما کا کہنا تھا کہ حکومت کو اپنی پوزیشن واضح کرنی چاہیے اور عمران خان سے ملاقات کرانے میں تاخیری حربے استعمال نہیں کرنا چاہیے۔