وفاقی وزیر قیصر شیخ وزارت چھوڑنے کی دھمکی

 وزیراعظم ملاقات کیلئے وقت نہیں دیتے، ڈھائی سال میں ایک منٹ بھی نہیں ملا: قیصر شیخ 
 اسلام آباد(بیورو رپورٹ)وفاقی وزیر قیصر شیخ نے شکوہ کیا وزیراعظم ملاقات کیلئے وقت نہیں دیتے ، کوشش ہے جلد وزیراعظم ملیں یا پھر میں وزارت چھوڑ جائوں گا۔تفصیلات کے مطابق وفاقی وزیر برائے سرمایہ کاری قیصر احمد شیخ نے ایک ٹی وی انٹرویو میں حکومتی نظام، بیوروکریسی اور کرپشن پر شدید تحفظات کا اظہار کرتے ہوئے کہا کوشش پوری کرتا ہوں لیکن تکلیف میں ہوں نتائج نہیں دے پارہا، پہلے بھی کئی بار سوچا ہے اس نظام سے نکل جائوں لیکن پھر سوچتا ہوں جو تھوڑا بہت حصہ ڈال رہا ہوں وہ بھی ختم ہو جائے گا۔انھوں نے بتایا کہ میں نے اپنا 60 سالہ تجربہ استعمال کیا لیکن یہاں ہر لیول پر کرپشن ہو رہی ہے، میں پوری محنت کے بعد جب آگے بات کرتا ہوں تو بیوروکریٹس اس پر عمل ہی نہیں کرتے۔قیصر احمد شیخ نے شکوہ کرتے ہوئے بتایا کہ ڈھائی سال کے عرصے میں وزیراعظم نے انہیں ایک منٹ کے لیے بھی ملاقات کا وقت نہیں دیا۔انہوں نے طنزاً کہامحسن نقوی وزیر داخلہ ہیں، شاید اس لیے وزیراعظم ان سے زیادہ ملتے ہیں۔انہوں نے واضح کیا کہ ان کی کوشش ہے کہ جلد وزیراعظم سے ملاقات ہو جائے، ورنہ وہ اپنا عہدہ چھوڑ دوں۔انہوں نے کہاکہ پہلے پارٹی کی پارلیمانی پارٹی کی میٹنگز ہوتی تھیں ایک طریقہ کار تھا لیکن اب وہ بھی کم ہوتی ہیں۔حکومتوں کی کارکردگی پر بات کرتے ہوئے ان کا کہنا تھا کہ ملک میں حکومتیں تو بدلتی رہیں لیکن غریب عوام کی حالت میں کوئی تبدیلی نہیں آئی،بلکہ معاملات اور زیادہ تکلیف دہ ہو گئے ہیں ،عوام کی قوت خرید ختم ہو گئی ہے اور غربت کی سطح مزید نیچے چلی گئی ہے۔