ایشیا کپ کاکل سے آغاز، پاک بھارت ٹاکرا 14 ستمبر کو ہوگا

دبئی (سپورٹس ڈیسک) ایشیا کپ کا آغاز  (کل)  منگل9ستمبر سے ہور رہا ہے ‘ ٹورنامنٹ سب سے بڑا مقابلہ بھارت اور پاکستان کے درمیان14ستمبر کو ہوگا‘ دونوں ملکوں کی ٹیمیں مئی میں فوجی جھڑپ کے بعد پہلی بار کرکٹ میں آمنے سامنے آئیں گے۔متحدہ عرب امارات میں 8 ٹیموں پر مشتمل ایونٹ کا آغاز ابو ظہبی میں افغانستان اور ہانگ کانگ کے درمیان میچ سے ہوگا۔روایتی حریف بھارت اور پاکستان 14 ستمبر کو دبئی میں ٹکرائیں گے، پاکستان کے عظیم بولر وسیم اکرم کا کہنا ہے کہ کھلاڑیوں اور شائقین دونوں کو صبر و تحمل کا مظاہرہ کرنا چاہیے اور حد سے تجاوز نہیں کرنا چاہیے۔دونوں پڑوسی ممالک نے 2012 کے بعد سے کسی دوطرفہ سیریز میں ایک دوسرے کی سرزمین پر مقابلہ نہیں کھیلا اور اب صرف غیر جانبدار مقامات پر بین الاقوامی ٹورنامنٹس میں آمنے سامنے آتے ہیں، جو ایک سمجھوتے کا حصہ ہے۔ایشیا کی یہ دونوں بڑی کرکٹ ٹیمیں ایک ہی گروپ میں شامل ہیں اور ایونٹ کے دوران 3 بار بھی ایک دوسرے سے کھیل سکتی ہیں، ٹورنامنٹ کا فائنل 28 ستمبر کو دبئی میں ہوگا۔بھارت ایشیا کپ کا دفاعی چیمپئن بھی ہے اور سوریا کمار یادو کی قیادت میں پرانے حریفوں کے خلاف واضح فیورٹ ہے، کیوں کہ ٹی ٹوئنٹی انٹرنیشنل کے میچز میں اس کا پاکستان کے خلاف 03-10 کا ریکارڈ ہے۔ایشین کرکٹ کونسل کے 5 فل ممبرز افغانستان، پاکستان، بھارت، بنگلہ دیش اور سری لنکا نے خودکار طور پر کوالیفائی کیا ہے۔ان کے ساتھ ہانگ کانگ، عمان اور یو اے ای شامل ہیں، جنہوں نے اے سی سی مینز پریمیئر کپ میں ٹاپ 3 میں جگہ بنا کر اپنی نشستیں حاصل کیں۔گروپ اے میں بھارت، پاکستان، میزبان یو اے ای اور عمان شامل ہیں۔گروپ بی میں افغانستان، بنگلہ دیش، ہانگ کانگ اور سری لنکا شامل ہیں، گروپ اسٹیج کے بعد سپر فور رانڈ کھیلا جائے گا اور پھر فائنل دبئی میں ہوگا۔