ویب ڈیسک: قومی ٹیم کے سابق فاسٹ بولر محمد عامر نے انڈین پریمئیر لیگ (آئی پی ایل) میں کھیلنے سے متعلق خبروں پر اپنے خیالات کا اظہار کیا۔
ایک نجی ٹی وی پروگرام میں محمد عامر سے سوال کیا گیا کہ چونکہ وہ جلد برطانوی پاسپورٹ حاصل کرلیں گے، کیا اس کے بعد ان کا آئی پی ایل کھیلنے کا ارادہ ہے؟ اس پر محمد عامر نے کہا کہ اگر انہیں آئی پی ایل میں کھیلنے کا موقع ملا تو وہ ضرور اس میں حصہ لیں گے۔محمد عامر نے کہا کہ اگر ان کو اگلے سال آئی پی ایل میں کھیلنے کا موقع ملتا ہے تو وہ اس موقع سے فائدہ اٹھائیں گے اور اس کے ساتھ ساتھ انہوں نے انڈین پریمئیر لیگ کی فرنچائز رائل چیلنجرز بنگلور (آر سی بی) کا نام لیتے ہوئے کہا کہ وہ اس ٹیم کی نمائندگی کرنا پسند کریں گے۔میزبان نے محمد عامر سے سوال کیا کہ جب پاکستانی کرکٹرز پر آئی پی ایل میں کھیلنے کی تنقید کی جائے گی تو وہ اس پر کیا ردعمل دیں گے؟ اس سوال کا جواب دیتے ہوئے محمد عامر نے کہا کہ وہ انٹرنیشنل کرکٹ سے ریٹائر ہوچکے ہیں، اس لیے اب انہیں اس حوالے سے کسی قسم کی پریشانی نہیں ہے۔
انہوں نے کہا کہ پاکستانی کرکٹرز پر آئی پی ایل میں پابندی تھی لیکن ہمارے سابق کرکٹرز آئی پی ایل کی کمنٹری کرتے رہے اور فرنچائز کے کوچ بھی بنے۔اس دوران محمد عامر کے ساتھی کرکٹر احمد شہزاد نے کہا کہ رائل چیلنجر بنگلور کو اپنی گیند بازی میں مشکلات کا سامنا ہے اور ان کے خیال میں محمد عامر اس ٹیم کے لیے بہترین بولر ثابت ہو سکتے ہیں۔ احمد شہزاد نے یہ بھی کہا کہ محمد عامر کے پاس آر سی بی کو آئی پی ایل کا پہلا ٹائٹل جتوانے کی صلاحیت ہے۔اس بیان سے واضح ہوتا ہے کہ محمد عامر کے لیے آئی پی ایل میں کھیلنے کا خیال جذباتی اور پیشہ ورانہ طور پر پرکشش ہے، اور وہ رائل چیلنجر بنگلور کے ساتھ کھیلنے کا ارادہ رکھتے ہیں۔
