بھارتی سینما کے لیجنڈری اداکار دھرمیندر کے انتقال کے چند ہفتوں بعد، ان کی 90ویں سالگرہ کے موقع پر ان کی بیٹی اور اداکارہ ایشا دیول نے اپنے والد کے نام ایک دل چھولے اور جذباتی خراجِ عقیدت پیش کیا۔
ایشا دیول نے پیر کے روز انسٹاگرام پر دھرمیندر کے ساتھ اپنی تصاویر شیئر کیں اور والد کے ساتھ وابستہ گہرے رشتے اور یادوں کا ذکر کرتے ہوئے کہا کہ ہمارا رشتہ ہمیشہ مضبوط اور محبت بھرا رہا، چاہے زمین ہو یا آسمان، ہم ہمیشہ ایک ساتھ ہیں۔ انہوں نے اپنے پیغام میں کہا کہ انہوں نے والد کی یادوں کو اپنے دل میں سمیٹ لیا ہے تاکہ وہ ہمیشہ ان کے قریب رہیں۔ایشا دیول نے دھرمیندر کے چھوڑے گئے ورثے کا ذکر کرتے ہوئے کہا کہ ان کی یادیں، زندگی کے سبق، رہنمائی، بے لوث محبت اور وقار و طاقت، جو انہوں نے بطور بیٹی انہیں دی، ان کا کوئی نعم البدل نہیں۔ انہوں نے والد کے وہ محافظانہ، محبت بھرے ہاتھ اور آواز کو یاد کیا جس میں ہنسی، شاعری اور محبت شامل تھی۔اپنے پیغام کے آخر میں انہوں نے والد کے اصولوں کو آگے بڑھانے کا عزم ظاہر کیا اور کہا کہ والد کا اصول کہ ہمیشہ عاجز رہو، خوش رہو، صحت مند اور طاقتور رہو، وہ اپنی زندگی بھر فخر اور احترام کے ساتھ آگے بڑھائیں گی اور کوشش کریں گی کہ ان کی محبت اُن لاکھوں لوگوں تک بھی پہنچے جو انہیں بے انتہا محبت کرتے ہیں۔
یاد رہے کہ دھرمیندر کا انتقال 24 نومبر کو ممبئی میں ان کی رہائش گاہ پر 89 برس کی عمر میں ہوا۔ انہیں نومبر کے آغاز میں بریچ کینڈی اسپتال منتقل کیا گیا تھا، تاہم 10 نومبر کو ان کی موت کی جھوٹی خبریں بھی گردش میں آئیں جنہیں ان کی اہلیہ ہیما مالنی اور بیٹی ایشا دیول نے تردید کی۔ بھارتی فلم انڈسٹری کے بڑے ناموں جیسے امیتابھ بچن، شاہ رخ خان، سلمان خان اور دیگر نے ان کی آخری رسومات میں شرکت کی اور اس محبوب اسٹار کو خراجِ عقیدت پیش کیا۔
