ملک بھر میں پیٹرول کی قیمت میں تقریباً 4 روپے 75 پیسے فی لیٹر اضافے کا امکان ہے، جب کہ ہائی اسپیڈ ڈیزل کی قیمت میں معمولی 20 پیسے فی لیٹر کا اضافہ متوقع ہے، بشرطیکہ حکومت اضافی پیٹرولیم لیوی عائد نہ کرے۔
ابتدائی تخمینوں کے مطابق، پیٹرول کی ایکس ریفائنری قیمت 270.03 روپے سے بڑھ کر 274.77 روپے فی لیٹر تک جا سکتی ہے، جس کی بڑی وجہ عالمی مارکیٹ میں پیٹرول کی FOB قیمت میں اضافے کو قرار دیا جا رہا ہے، جو 139.03 ڈالر سے بڑھ کر 143.01 ڈالر فی بیرل ہو گئی ہے۔ عالمی قیمتوں کے اثرات کے باوجود، ڈیزل کی قیمت میں صرف معمولی اضافہ ہونے کا امکان ہے، کیونکہ کسٹمز ڈیوٹی اور دیگر اخراجات میں کمی کی گئی ہے۔ حتمی قیمتوں کا اعلان حکومت کی جانب سے ٹیکس، لیوی اور شرح مبادلہ کے فیصلوں کے بعد کیا جائے گا۔
