پاکستان کی سیکیورٹی فورسز نے خیبر پختونخوا کے مختلف اضلاع میں دو علیحدہ کارروائیوں کے دوران دہشت گردوں کے خلاف کامیابی حاصل کی ہے، جن میں بھارتی سرپرستی میں سرگرم فتنے کے 10 دہشت گرد ہلاک ہوگئے۔
آئی ایس پی آر کے مطابق، پہلی کارروائی 6 اگست کو جنوبی وزیرستان کے اعظم ورسک میں کی گئی، جہاں دہشت گردوں نے سیکیورٹی چیک پوسٹوں پر حملہ کرنے کی کوشش کی۔ فورسز نے بروقت کارروائی کرتے ہوئے، فائرنگ کے تبادلے میں 8 دہشت گردوں کو ہلاک کیا۔ ان کے قبضے سے اسلحہ اور گولہ بارود بھی برآمد ہوا۔دوسری کارروائی ضلع دیر میں کی گئی، جس میں 2 دہشت گرد مارے گئے۔ اس طرح مجموعی ہلاکتیں 10 دہشت گردوں کی ہوئیں۔ ان دہشت گردوں کے قبضے سے بھاری مقدار میں اسلحہ اور گولہ بارود برآمد ہوا، جو علاقے میں دہشت گردی کی متعدد کارروائیوں میں ملوث تھے۔ترجمان کے مطابق، علاقے میں مزید دہشت گردوں کی موجودگی کے خدشے کے پیش نظر کلیئرنس اور سرچ آپریشن جاری ہے۔ پاکستان کی سیکیورٹی فورسز اور قانون نافذ کرنے والے ادارے دہشت گردی کے مکمل خاتمے کے لیے عزمِ استحکام وژن کے تحت بھرپور آپریشنز جاری رکھیں گے۔
صدر پاکستان جناب آصف علی زرداری نے ان کارروائیوں کو سراہتے ہوئے سیکیورٹی فورسز کو خراج تحسین پیش کیا اور کہا کہ قوم اپنی بہادر فورسز کے ساتھ کھڑی ہے۔ انہوں نے بھارتی سرپرستی میں سرگرم دہشت گرد عناصر کے مذموم عزائم کو ہر قیمت پر ناکام بنانے کا عزم ظاہر کیا۔
وزیراعظم محمد شہباز شریف نے بھی سیکیورٹی فورسز کی کارکردگی کو سراہتے ہوئے کہا کہ قوم اپنے بہادر جوانوں کی قربانیوں پر فخر کرتی ہے، اور دہشت گردی کے خلاف آپریشنز جاری رہیں گے۔ انہوں نے کہا کہ حکومت اور قوم ایک قوم کی طرح دہشت گردی کے خلاف متحد ہیں اور ان کے عزائم کو ناکام بنائیں گے۔
