اسلام آباد: قومی اسمبلی کے اجلاس میں پاکستان تحریک انصاف کے رکن قومی اسمبلی شیر افضل مروت نے سخت لب و لہجے میں اظہار خیال کرتے ہوئے کہا ہے کہ موجودہ حالات سیاسی جماعتوں اور عوام کے دلوں میں نفرت کو جنم دے رہے ہیں۔
"ہمیں دہشت گرد بنایا جا رہا ہے"
شیر افضل مروت نے ایوان میں کہا:"آج ہمیں دہشت گرد بنا کر پیش کیا جا رہا ہے، یہ سب کچھ کب تک چلے گا؟ یہ وقت تو گزر جائے گا، مگر جو کچھ آج ہو رہا ہے، وہ لوگ بھولیں گے نہیں۔"
چارٹر آف ڈیموکریسی پر تنقید:
انہوں نے یاد دہانی کرائی کہ:"پیپلز پارٹی اور مسلم لیگ ن نے چارٹر آف ڈیموکریسی پر دستخط کیے تھے، کیا اس لیے آج دیگر سیاسی جماعتوں کے ساتھ ایسا سلوک روا رکھا جا رہا ہے؟"
عدلیہ پر بھی تنقید:
ماضی کے عدالتی کردار کا حوالہ دیتے ہوئے شیر افضل مروت نے کہا:"سابق چیف جسٹس ثاقب نثار نے جو کچھ کیا، اس سے عدلیہ کی توقیر کو نقصان پہنچا، اور افسوس کے ساتھ کہنا پڑتا ہے کہ آج بھی ویسا ہی ماحول ہے۔"
ایوان کے باہر سیکیورٹی فورسز کی موجودگی پر برہمی:
پی ٹی آئی کے رہنما نے کہا:"اسمبلی کے باہر ایجنسیاں اور پولیس اہلکار کھڑے ہوتے ہیں، کیا یہ جمہوریت ہے؟ مجھے ایک دن کا اختیار دے دیں، میں دیکھتا ہوں کون اہلکار باہر کھڑا ہوتا ہے!"
تحفظِ ایوان کا مطالبہ:
شیر افضل مروت نے مطالبہ کیا کہ:"قومی اسمبلی پر ہونے والے مبینہ حملے کی تحقیقات کے لیے ایک پارلیمانی کمیٹی بنائی جائے تاکہ حقائق عوام کے سامنے آ سکیں۔"
