اگست میں یومِ آزادی اور چہلم حضرت امام حسینؑ ایک ساتھ آنے کے باعث ملک بھر میں چار روزہ تعطیلات کا قوی امکان ہے، جس سے عوام، طلباء، اساتذہ اور سرکاری و نجی ملازمین یکجا چھٹیوں سے فائدہ اٹھا سکیں گے۔
ذرائع کے مطابق 14 اگست کو یومِ آزادی کے موقع پر ملک بھر میں عام تعطیل ہوگی۔ حکومت نے اس دن کو قومی جوش و جذبے سے منانے کا اعلان کیا ہے، جس کے تحت پرچم کشائی کی تقریبات، ثقافتی پروگرامز، پریڈز اور تحریکِ آزادی کے ہیروز کو خراجِ تحسین پیش کرنے کی تقریبات منعقد کی جائیں گی۔دوسری جانب 15 اگست کو حضرت امام حسینؑ اور شہدائے کربلا کا چہلم مذہبی عقیدت و احترام سے منایا جائے گا۔ اس موقع پر ملک بھر میں مجالس، ماتمی جلوس اور دیگر مذہبی اجتماعات منعقد ہوں گے، جہاں واقعہ کربلا کی یاد تازہ کی جائے گی اور شہداء کو خراج عقیدت پیش کیا جائے گا۔
اگرچہ 15 اگست کو چہلم کی تعطیل وفاقی تعطیلات کی فہرست میں شامل نہیں، تاہم صوبائی حکومتیں اپنے طور پر مقامی تعطیل کا اعلان کر سکتی ہیں۔ ماضی میں بھی، خصوصاً کراچی اور راولپنڈی میں چہلم کے موقع پر مقامی تعطیل کا اعلان کیا گیا تھا۔یاد رہے کہ 16 اور 17 اگست کو ہفتہ اور اتوار کی معمول کی تعطیلات آتی ہیں، اس طرح 14 اگست (جمعرات) سے 17 اگست (اتوار) تک مجموعی طور پر 4 دن مسلسل تعطیلات ہو سکتی ہیں۔ یہ وقفہ عوام کو آرام، مذہبی رسومات میں شرکت اور تفریح کا موقع فراہم کرے گا۔
تاہم، حتمی اعلان کا انحصار وفاقی اور صوبائی حکومتوں کے فیصلوں پر ہوگا، جن کے بارے میں جلد باضابطہ اعلامیہ جاری کیے جانے کی توقع ہے۔
