بجلی ریلیف پیکیج کو اعلان کے مطابق نافذ کیا جائیگا، پاور ڈویژن

نرخوں میں تبدیلی کی خبریں بے بنیاد ، بعض عناصر حقائق کو مسخ کر رہے ہیں
موسم گرما کے باعث وزیراعظم نے صارفین پر بوجھ کم کرنے کی ہدایت کر دی 
اسلام آباد(خصوصی رپورٹ)ترجمان پاور ڈویڑن ظفریاب خان نے واضح کیا کہ حکومت کی جانب سے اعلان کردہ بجلی کے نرخوں میں ریلیف پر عملدرآمد کیا جائے گا۔اتوار کو ٹی وی سے گفتگو کرتے ہوئے انہوں نے کہا کہ بجلی کے نرخوں میں کسی قسم کی تبدیلی کی خبریں بے بنیاد اور متضاد ہیں۔انہوں نے کہا کہ بعض عناصر جان بوجھ کر بجلی کے نرخوں اور اس کی تکنیکی تفصیلات سے متعلق غلط معلومات پھیلا کر حقائق کو مسخ کر رہے ہیں۔ انہوں نے مزید کہا کہ اس طرح کی رپورٹیں حکومت کے سرکاری موقف کو غلط انداز میں پیش کرتی ہیں اور اس کا مقصد عوام میں الجھن پیدا کرنا ہے۔انہوں نے کہا کہ جاری موسم گرما کو دیکھتے ہوئے وزیراعظم نے صارفین پر بوجھ کم کرنے کے لیے فوری کارروائی کی ہدایت کی۔وزیراعظم کے اعلان کے بعدنیپرا نے بغیر کسی تاخیر کے ریلیف پیکیج پر عمل درآمد کے لیے 4 اپریل کو عوامی سماعت کی۔انہوں نے مزید کہا کہ ریلیف پیکیج کی وفاقی کابینہ پہلے ہی منظوری دے چکی ہے اور اس کا اطلاق ملک بھر کی تمام پاور ڈسٹری بیوشن کمپنیوں پر ہوگا۔ترجمان نے کہا کہ یہ ریلیف مہینوں کی مسلسل کوششوں کی وجہ سے ممکن ہوا ہے جس میں ٹیرف کو کم کرنے کے لیے آزاد پاور پروڈیوسرز (آئی پی پیز) کے ساتھ مذاکرات شامل ہیں۔انہوں نے کہا کہ جب اصل اثر عوام تک پہنچ رہا ہو تو ٹیرف کے زمرے پر بحثیں غیر ضروری ہیں۔