پاکستان کے بڑے شہر لاہور اور کراچی فضائی آلودگی کے بحران سے گزر رہے ہیں، جن کی حالت عالمی سطح پر بھی تشویشناک قرار دی گئی ہے۔
لاہور دنیا کے آلودہ ترین شہروں میں پانچویں نمبر پر آگیا ہے، جہاں ایئر کوالٹی انڈیکس (AQI) 176 ریکارڈ کیا گیا ہے۔ فضا میں آلودہ ذرات کی مقدار 181 پرٹیکیولیٹ میٹرز تک پہنچ گئی ہے۔ مختلف علاقوں میں آلودگی کی سطح بہت زیادہ ہے، مثلاً برکی روڈ پر AQI 228، علامہ اقبال ٹاؤن میں 227، گلبرگ میں 221، سول سیکرٹریٹ کے علاقے میں 217، اور ڈی ایچ اے فیز 5 میں 204 ریکارڈ کیا گیا ہے۔ شہر کا زیادہ سے زیادہ درجہ حرارت 26 ڈگری سینٹی گریڈ اور کم سے کم 13 ڈگری سینٹی گریڈ ہے، ہوا کی رفتار 8 کلومیٹر فی گھنٹہ اور نمی کا تناسب 64 فیصد ہے۔ ماحولیاتی ماہرین نے شہریوں کو ہدایت دی ہے کہ ماسک کا استعمال کریں اور غیر ضروری سفر سے گریز کریں۔ شہر میں ٹریفک کی غفلت اور انفورسمنٹ ٹیموں کی عدم موجودگی کی وجہ سے صورتحال مزید بگڑی ہے۔
دوسری جانب کراچی بھی فضائی آلودگی سے متاثر ہے، جہاں AQI 159 ریکارڈ کیا گیا ہے۔ شہر کا موجودہ درجہ حرارت 18 ڈگری سینٹی گریڈ ہے، اور آج زیادہ سے زیادہ درجہ حرارت 33 سے 35 ڈگری سینٹی گریڈ کے درمیان جانے کا امکان ہے۔ ہوا میں نمی کا تناسب 37 فیصد ہے، اور شمال مشرقی سمت سے خشک ہوائیں چل رہی ہیں۔ کراچی بھی دنیا کے آلودہ ترین شہروں کی فہرست میں 10ویں نمبر پر ہے۔ ماحولیاتی ماہرین نے شہریوں کو غیر ضروری سرگرمیاں محدود کرنے اور ماسک کا استعمال کرنے کی ہدایت کی ہے۔ماحولیاتی ماہرین کا کہنا ہے کہ فضائی آلودگی کے یہ بڑھتے ہوئے اثرات صحت کے لیے انتہائی خطرناک ہیں، اور شہریوں کو حفاظتی تدابیر اپنانی چاہئیں۔
