ویب ڈیسک: امریکی صدر ڈونلڈ ٹرمپ نے حماس پر شدید تنقید کرتے ہوئے کہا ہے کہ وہ غزہ میں قید تمام یرغمالیوں کو فوراً رہا کرے۔
ٹرمپ نے حماس کو سخت تنبیہ کرتے ہوئے کہا کہ اگر یرغمالیوں کو رہا نہیں کیا گیا تو اس کا سنگین نتیجہ بھگتنا پڑے گا۔امریکی صدر نے حماس کی قیادت پر غزہ چھوڑنے کا دباؤ ڈالا، اور کہا کہ یہ وقت ہے کہ حماس اپنے قبضے سے غزہ کو چھوڑ دے، ورنہ اس کا سامنا سنگین نتائج سے ہوگا۔ انہوں نے مزید کہا کہ غزہ کے عوام کے لیے ایک خوبصورت مستقبل انتظار کر رہا ہے، لیکن اس کے لیے حماس کو اپنی موجودہ پوزیشن تبدیل کرنا ہوگی۔دوسری جانب، حماس نے امریکہ کے صدر کی اس دھمکی کو مسترد کرتے ہوئے واضح طور پر کہا کہ امریکی انتظامیہ فلسطینیوں کی نسل کشی میں ملوث ہے اور ٹرمپ کے بیانات اس بات کا واضح ثبوت ہیں کہ امریکہ فلسطینیوں کے خلاف اقدامات میں شریک ہے۔ حماس کا موقف ہے کہ امریکی صدر کا یہ بیان فلسطینی عوام کے حقوق کی خلاف ورزی ہے اور اس کے ذریعے فلسطینیوں کو مزید نقصان پہنچانے کی کوشش کی جا رہی ہے۔یہ بیان ایک ایسے وقت میں آیا ہے جب اسرائیل اور حماس کے درمیان کشیدگی میں اضافہ ہو رہا ہے اور غزہ میں انسانی بحران شدت اختیار کر گیا ہے۔ امریکہ کا اس تنازع میں مداخلت کا مقصد حماس پر دباؤ ڈالنا اور غزہ کے حالات میں تبدیلی لانا ہے۔
