شوگر ملز کو جرمانے، سپریم کورٹ کا ٹریبونل کو 90 روز میں فیصلہ کرنیکا حکم

 چیئرمین مسابقتی کمیشن کا نیم عدالتی کارروائی میں شامل ہونا اور فیصلہ کن ووٹ کا حق دینا ڈبل ووٹ کے مترادف ہے
مسابقتی کمیشن میں 4 ممبران نے درخواست گزار شوگر ملز مالکان کو سنا، چیئرمین اور ایک ممبر نے جرمانے عائد کئے
اسلام آباد(آئی  این پی ) سپریم کورٹ آف پاکستان  نے 72 شوگر ملز کو جرمانے کے معاملے میں مسابقتی کمیشن کے فیصلے کے خلاف درخواست کی سماعت کے دوران فیصلہ دیا کہ ٹربیونل کیس سن کر 90 روز میں فیصلہ کرے۔چیف جسٹس یحیی آفریدی کی سربراہی میں سپریم کورٹ کی 3 رکنی بنچ نے سماعت کے بعد فریقین کو نوٹس جاری کر دیے، کیس کی مزید سماعت  جمعرات تک ملتوی کر دی گئی  ۔مسابقتی کمیشن کی وکیل عصمہ حامد نے عدالت سے استدعا کی کہ آرڈر میں کمیشن کو کیس سننے کے الفاظ شامل کیے جائیں، چیف جسٹس نے کہا کہ آپ کی اپیل میں بس اتنی سی استدعا ہے تو ہم آرڈر کردیتے ہیں۔جسٹس شکیل احمد نے کہا کہ ہم تمام فریقین کو سن کر ہی فیصلہ کریں گے‘۔سپریم کورٹ نے قرار دیا  چیئرمین مسابقتی کمیشن کا نیم عدالتی کارروائی میں شامل ہونا اور دوبارہ فیصلہ کن ووٹ کا حق دینا ڈبل ووٹ کے مترادف ہے۔عدالت عظمی نے واضح کیا کہ شق 24(5) کا استعمال صرف انتظامی سطح پر ہو سکتا ہے اور ٹریبونل 90 روز میں کیس سن کر فیصلہ کرے۔